काठमाडौं । ट्रम्प प्रशासनले हार्वर्ड विश्वविद्यालयको अन्तर्राष्ट्रिय विद्यार्थीहरुलाई भर्ना गर्ने अधिकार समाप्त गरेको छ। यस कारणले गर्दा अमेरिकाको सबैभन्दा पुरानो विश्वविद्यालयसँगको गतिरोध अब बढेको छ।
अमेरिकी गृह सुरक्षा सचिव क्रिस्टी नोएमले सामाजिक सञ्जाल प्लेटफर्म ‘एक्स’मा लेखेकी छिन्, ‘ट्रम्प प्रशासनले हार्वर्डको अन्तर्राष्ट्रिय विद्यार्थी भर्ना कार्यक्रम कानुनको पालना गर्न असफल भएको कारणले निलम्बन गरेको छ।’
‘यो देशभरका सबै विश्वविद्यालय र शैक्षिक संस्थाहरुका लागि चेतावनी हो’, उनले थप लेखेकी छन्।
हार्वर्ड विश्वविद्यालयले एक विज्ञप्तिमा उक्त कदमलाई ‘अवैध’ भनेको छ। ट्रम्प प्रशासनको कदमको जबाफमा हार्वर्ड विश्वविद्यालयले भन्यो, ‘हामी १४० भन्दा बढी देशबाट यहाँ आउने हाम्रा अन्तर्राष्ट्रिय विद्यार्थी र विद्वानहरुलाई भर्ना गर्ने क्षमता कायम राख्न र विश्वविद्यालय र यो राष्ट्रलाई यति धनी बनाउने प्रतिबद्ध छौँ।’
विश्वविद्यालयले भन्यो, ‘हामी हाम्रो समुदायका सदस्यहरुबाट मार्गदर्शन र समर्थन जुटाउन द्रुतगतिमा काम गरिरहेका छौँ। यो प्रतिशोधात्मक कार्यले हार्वर्ड समुदाय र हाम्रो देशलाई गम्भीर हानी पुर्याउने खतरा छ। यसले हार्वर्डको शैक्षिक र अनुसन्धान अभियानलाई पनि कमजोर बनाउँछ।’
ट्रम्प प्रशासनको यो निर्णयले हार्वर्ड विश्वविद्यालयमा अध्ययनरत हजारौँ अन्तर्राष्ट्रिय विद्यार्थीलाई असर गर्न सक्छ। हार्वर्ड विश्वविद्यालयको तथ्यांकअनुसार गत शैक्षिक वर्षमा ६ हजार ७०० भन्दा बढी अन्तर्राष्ट्रिय विद्यार्थीले भर्ना भएका थिए। यो कुल विद्यार्थी संख्याको २७ प्रतिशत हो। –एजेन्सुी
