काठमाडौं । विश्वकै सबैभन्दा प्रभावशाली प्रविधि सम्मेलन ’वेब समिट कतार २०२६’ मा सहभागिता जनाउँदै नेपाली एआई कम्पनी टिङ टिङले एक ऐतिहासिक सफलता हाँसिल गरेको छ । कतारको दोहामा, फेब्रुअरी ४ मा सम्पन्न भएको चार दिने उक्त सम्मेलनमा टिङ टिङ नेपालको एकमात्र प्रतिनिधित्व गर्ने स्टार्टअपको रूपमा सहभागी भएको थियो ।
वेब समिट विश्वभरका प्रविधि विशेषज्ञ र लगानीकर्ताहरूको सबैभन्दा ठूलो मञ्च हो, जहाँ सहभागी हुन हजारौँ वैश्विक कम्पनीहरूबीच कडा प्रतिस्पर्धा हुने गर्दछ । १२० देशका १,६०० भन्दा बढी स्टार्टअपहरू सहभागी भएको यस सम्मेलनमा टिङ टिङको छनोट हुनु आफैँमा एक ठूलो उपलब्धि थियो । नेपालमै निर्मित आफ्नै ’रिरी’ इन्जिन र स्थानीय भाषालाई बुझ्ने अत्याधुनिक प्रणालीका कारण टिङ टिङले यस मञ्चमा आफ्नो स्थान सुरक्षित गरेको हो।
“नेपालमा निर्मित, विश्वका लागि भन्ने मूल मन्त्र बोकेको टिङ टिङले विश्वमञ्चमा पुग्नुअघि स्वदेशी बजारमै आफूलाई प्रमाणित गरिसकेको छ । नेपालका ठूला बैंक, इन्टरनेट सेवा प्रदायक र सरकारी निकायहरूको सञ्चार प्रणालीलाई सफल व्यवस्थापन गर्दै ’ब्याटल टेस्टेड’ भइसकेको यो प्रविधि अब विश्वबजारमा विस्तार हुने क्रममा छ ।
सम्मेलनको एक महत्वपूर्ण पक्षको रूपमा रहेको ’स्टार्टअप शोकेस’ मा टिङ टिङको तर्फबाट डाइरेक्टर अफ इन्जिनियरिङ, एन्जेलिका साहले आफ्नो प्रस्तुति दिएकी थिइन् । विश्वका प्रभावशाली लगानीकर्ता र प्रविधि विशेषज्ञहरूका सामु दिइएको उक्त प्रस्तुतिमा एन्जेलिकाले नेपालमा विकसित एआई प्रविधिले कसरी ठूला संस्थाहरूलाई आफ्ना ग्राहकका कुराहरू गहिराइमा बुझ्न मद्दत गरिरहेको छ भन्ने कुरा प्रष्ट पारेकी थिइन् ।
सम्मेलनका क्रममा टिङ टिङको टोलीले विभिन्न अन्तर्राष्ट्रिय लगानीकर्ता र प्रविधि क्षेत्रका दिग्गजहरूसँग अर्थपूर्ण संवाद र नयाँ साझेदारीका लागि महत्वपूर्ण छलफलहरू समेत गरेको छन् ।
टिङ टिङका यो प्रमुख कोशेढुङ्गाले नेपाल अब प्रविधिको उपभोक्ता मात्र नभई विश्वव्यापी स्तरमा प्रतिस्पर्धा गर्न सक्ने उत्पादकको रूपमा पनि उदाइरहेको सन्देश दिएको छ । काठमाडौंबाट सुरु भएको यो यात्रा विश्वको भव्य चरणमा पुगेको छ, जसले हाल अन्य अन्तर्राष्ट्रिय भाषाहरूतर्फ पनि कसरी गहन रूपमा काम गरिरहेको छ भन्ने कुरा देखाउँछ ।
यस सहभागिताले नेपाली स्टार्टअप इकोसिस्टमका लागि अन्तर्राष्ट्रिय लगानी र विश्वव्यापी साझेदारीको नयाँ बाटो खोलेको विश्वास गरिएको छ । नेपालमा बनेको प्रविधिले पनि विश्वका ठूला समस्याहरू समाधान गर्न सक्छ भन्ने कुरा टिङ टिङले यस समिटमार्फत विश्वलाई देखाएको छ ।
