काठमाडौं । बीमा कम्पनीहरुले विभिन्न क्षेत्रमा लगानी गर्नुपर्ने प्रावधान रहेको छ। यद्यपि, बीमा कम्पनीहरुको लगानीको ठूलो हिस्सा बैंकहरुको मुद्दति निक्षेपमा देखिएको छ।
हाल १४ वटा जीवन बीमा, १४ वटा निर्जीवन बीमा, ४ वटा लघु निर्जीवन बीमा, ३ वटा लघु जीवन बीमा र २ वटा पुनर्बीमा कम्पनी रहेका छन्। बीमकहरुले मुद्दति निक्षेपका रुपमा वाणिज्य बैंक र पूर्वाधार बैंकमा गरी कुल लगानीयोग्य रकमको ३० प्रतिशत, विकास बैंकमा १० प्रतिशत र फाइनान्स कम्पनीमा ५ प्रतिशत लगानी गर्न पाउने प्रावधान रहेको छ।
नेपाल राष्ट्र बैंकले सार्वजनिक गरेको चालु आर्थिक वर्ष २०८२।८३ को ८ महिना फागुनसम्मको तथ्यांकले पछिल्लो एक वर्षको अवधिमा बैंकहरुको मुद्दति निक्षेपमा बीमा कम्पनीहरुको लगानी ३ प्रतिशत बढीले बढेको देखाएको छ।
फागुनसम्म बैंकहरुको मुद्दति निक्षेपमा बीमा कम्पनीहरुले ६ खर्ब ६६ अर्ब २३ करोड रुपैयाँ लगानी गरेका छन्। अघिल्लो आर्थिक वर्ष २०८१।८२ को फागुनसम्म बीमा कम्पनीहरुले बैंकहरुको मुद्दति निक्षेपमा ६ खर्ब ४४ अर्ब ४१ करोड रुपैयाँ लगानी गरेका थिए। अघिल्लो वर्षको तुलना समीक्षा अवधिसम्म बीमकको लगानी ३.३७ प्रतिशतले बढेको हो।
यसैगरी चालु वर्षको फागुनसम्म कर्मचारी सञ्चय कोषले बैंकहरुको मुद्दति निक्षेपमा १ खर्ब ८१ अर्ब ३६ करोड रुपैयाँ लगानी गरेका छन्। अघिल्लो वर्ष यही अवधिसम्म कोषले १ खर्ब ७७ अर्ब ३ करोड ९४ लाख रुपैयाँ लगानी गरेको थियो। अघिल्लो वर्षको तुलनामा समीक्षा अवधिमा कोषको लगानी २.४५ प्रतिशतले बढेको छ।
उता नागरिक लगानी कोषले समीक्षा अवधिसम्म बैंकहरुको मुद्दति निक्षेपमा १ खर्ब ३२ अर्ब ३५ करोड रुपैयाँ लगानी गरेको छ। अघिल्लो वर्ष यही अवधिसम्म कोषले १ खर्ब ४० अर्ब रुपैयाँ लगानी गरेको थियो। कोषको लगानी ५.४६ प्रतिशतले घटेको छ।
समीक्षा अवधिसम्म बैंकहरुमा सर्वसाधारणको ४९ खर्ब ७० अर्ब ७ करोड रुपैयाँ निक्षेप रहेको छ। अघिल्लो वर्ष यही अवधिसम्म बैंकहरुमा सर्वसाधारणको ४२ खर्ब ६२ अर्ब १७ करोड रुपैयाँ निक्षेप रहेको थियो। सर्वसाधारणको निक्षेप १६.६१ प्रतिशतले बढेको छ।
