काठमाडौं । नेपाल धितोपत्र बोर्ड (सेबोन)मा बुधबार शेयर बजारका तीन नियामक निकायका प्रमुखहरुबीच भेटवार्ता भएको छ।
सेबोनको कार्यालयमा सेबोन अध्यक्ष सन्तोषनारायण श्रेष्ठ, नेपाल स्टक एक्सचेन्ज (नेप्से)का प्रमुख कार्यकारी अधिकृत (सीईओ) चूडामणि चापागाईं र सीडीएस एन्ड क्लियरिङ (सीडीएससी)की प्रबन्ध सञ्चालक प्रविन पन्दाकबीच भेटवार्ता भएको हो। भेटमा तीनैजनाबीच नेपालको पुँजीबजारको विकास र विस्तारका विषयमा छलफल भएको थियो।
पुँजीबजार र यससँग जोडिएका प्रणालीहरुलाई थप परिष्कृत बनाउँदै लग्ने विषयमा भएको बताइएको छ। भविष्यमा समेत यस्ता विषयमा नियमितरुपमा समन्वयात्मक बैठक जारी राख्ने विषयमा पनि श्रेष्ठ, चापागाईं र पन्दाकबीच कुराकानी भएको थियो।
छलफलमा सेबोनको नियमन विभागका प्रमुख मुक्तिनाथ श्रेष्ठ र सुपरिवेक्षण विभागका प्रमुख रुपेश केसीसमेत सहभागिता थियो।
