काठमाडौं । मुलुकको व्यापार घाटा बढेको छ। भन्सार विभागले सार्वजनिक गरेको चालु आर्थिक वर्षको जेठसम्मको तथ्यांकबाट यस्तो देखिएको हो।
समीक्षा अवधिसम्म मुलुकको व्यापार घाटाको आकार १६ खर्ब १६ अर्ब १३ करोड रुपैयाँ पुगेको छ। अघिल्लो आर्थिक वर्ष २०८१।८२ को जेठसम्म व्यापार घाटा १३ खर्ब ९७ अर्ब २२ करोड रुपैयाँ थियो। अघिल्लो वर्षको तुलनामा व्यापार घाटा १५.६७ प्रतिशतले बढेको छ।
यसैगरी चालु वर्षको जेठसम्म १८ खर्ब ९४ अर्ब ९ करोड रुपैयाँबराबरको वस्तु आयात भएको छ। अघिल्लो वर्ष यही अवधिसम्म १६ खर्ब ४४ अर्ब ७९ करोड रुपैयाँबराबरको वस्तु आयात भएको थियो। अघिल्लो वर्षको तुलनामा वस्तु आयात १५.१६ प्रतिशतले बढेको छ।
जेठसम्म मुलुकबाट २ खर्ब ७७ अर्ब ९६ करोड रुपैयाँबराबरको वस्तु निर्यात भएको छ। अघिल्लो वर्ष जेठसम्म २ खर्ब ४७ अर्ब ५७ करोड रुपैयाँबराबरको वस्तु निर्यात भएको थियो। अघिल्लो वर्षको तुलनामा वस्तु निर्यात १२.२८ प्रतिशतले बढेको छ।
मुलुकको कुल वैदेशिक व्यापार १४.७८ प्रतिशतले बढेर २१ खर्ब ७२ अर्ब ६ करोड रुपैयाँ पुगेको छ।
