काठमाडौं । थाइल्यान्डको बीमा नियामक बीमा आयोगको कार्यालय (ओआईसी)ले अनिवार्य र स्वेच्छिक मोटर बीमाका लागि कभरेज सीमामा उल्लेखनीय बढाएको छ।
नयाँ नियमहरुअनुसार अब प्रतिदुर्घटना २ करोड भाट (लगभग ८ करोड ७० लाख रुपैयाँ)सम्मको क्षतिपूर्ति भुक्तानी गरिनेछ। यद्यपि यो कदम ठूला सडक दुर्घटनाका पीडितको उचित सुरक्षा सुनिश्चित गर्न हो। प्रिमियममा भने कुनै वृद्धि हुने छैन।
ओआईसी रजिस्ट्रारको आदेश नम्बर ५१÷२५६८ अनुसार अनिवार्य मोटर बीमा ऐनले अब सबै प्रकारका सवारीसाधनका लागि प्रतिदुर्घटना २ करोड भाटको कभरेज सीमा तोकेको छ।
यो तुरुन्तै लागू हुनेछ। अर्थात् मौजुदा पोलिसी र नयाँ सम्झौता दुवैमा लागू हुनेछ। यद्यपि बीमा कम्पनीहरुले सन् २०२६ जनवरी १ देखि नयाँ फोलिसी फारम र सर्तहरु अद्यावधिक गर्नुपर्नेछ।
यसका साथै तेस्रो पक्ष दायित्व श्रेणीमा स्वेच्छिक मोटर बीमाका लागि मृत्यु वा स्थायी कुल अशक्तता क्षतिपूर्ति सीमा न्यूनतम २ करोड भाटमा तय गरिएको छ। यो सन् २०२६ जनवरी १ देखि जारी गरिएका नयाँ पोलिसीहरुमा लागू हुनेछ। यही नियम विद्युतीय सवारीसाधन बीमामा पनि लागू हुनेछ।
सन् २०२० को सुरुमा ओआईसीले अनिवार्य मोटर बीमाको क्षतिपूर्ति सीमा प्रतिव्यक्ति ३ लाख भाटबाट बढाएर ५ लाख भाटबाट पुर्याएको थियो। यद्यपि, प्रतिदुर्घटना अधिकतम सीमा ७ सिटभन्दा कम भएका कारका लागि ५० लाख भाट र ७ भन्दा बढी सिट भएका कारका लागि १ करोड भाट थियो।
अर्कोतर्फ स्वेच्छिक मोटर बीमाका लागि धेरैजसो पोलिसीको कभरेज सीमा अधिकतम १ करोड भाट थियो। फलस्वरुप ठूला दुर्घटनामा धेरै पीडितलाई पर्याप्त क्षतिपूर्ति प्रदान गर्न सम्भव थिएन।
ओआईसीका सहायक महासचिव पैबुन पियाम्मेट्टाले नयाँ आदेश वास्तविकतासँग मेल खाने र दुर्घटना पीडितका लागि उचित सुरक्षा सुनिश्चित गर्ने बताए। ‘सबैभन्दा महत्वपूर्ण कुरा प्रिमियम नबढाई कभरेज सीमा बढाइएको छ’, उनले भने।
विज्ञहरुका अनुसार यो कदमले थाइल्यान्डको सडक सुरक्षा र उपभोक्ता संरक्षण प्रणालीलाई बलियो बनाउनेछ। एकातिर ठूला दुर्घटनामा पीडितले पर्याप्त क्षतिपूर्ति पाउनेछन् भने अर्कोतर्फ पोलिसीधारकहरुले कुनै अतिरिक्त आर्थिक दबाबको सामना गर्नुपर्ने छैन। फलस्वरुप यो बीमा क्षेत्र र समाज दुवैका लागि सकारात्मक र आवश्यक सुधार मानिन्छ।
