काठमाडौं । थाइल्यान्डको बीमा आयोग (ओआईसी)को कार्यालयले सन् २०२६–२०३० का लागि आफ्नो पाँचौँ बीमा विकास योजना घोषणा गरेको छ।
यो योजना ४ मुख्य रणनीतिमा आधारित छ। ती रणनीति बलियो र लचिलो बीमा प्रणाली निर्माण गर्ने, ठूला स्तरका जोखिम र नयाँ चुनौतीको व्यवस्थापन गर्ने, बीमामा विश्वव्यापी पहुँच प्रवर्द्धन गर्ने र जिम्मेवार सूचना तथा प्रविधि इकोसिस्टम सिर्जना गर्ने रहेको छ।
आयोगका महासचिव चुचाट प्रमुलपोलका अनुसार यो योजनाले थाइल्यान्डको बीमा प्रणालीको ‘संरचनात्मक विकास’लाई प्रतिनिधित्व गर्दछ। कम्पनीहरुलाई आधुनिकीकरणमा केन्द्रित गर्ने अघिल्ला प्रयासभन्दा फरक, पाँचौँ योजनाले एक जोडिएको डाटा इकोसिस्टम सिर्जना गर्ने, समूहव्यापी पर्यवेक्षण लागू गर्ने र बीमालाई राष्ट्रिय जोखिम व्यवस्थापनका लागि एक प्रमुख प्रणाली बनाउने लक्ष्य राखेको छ।
यस्ता छन् ४ रणनीति
स्थिरताः अन्तर्राष्ट्रिय विश्वास बढाउन र व्यावसायिक जोखिम कम गर्न बलियो पुँजी मापदण्ड, समावेशी शासन र मुख्य ईएसजी सिद्धान्त संयोजन गरेर बीमा प्रणालीको सुरक्षा निर्माण गर्ने।
लचिलोपनः ठूला विपत्तिहरबाट हुने क्षतिको प्रभावकारी रुपमा भविष्यवाणी गर्न, रोक्न र कम गर्न उन्नत जोखिम मोडेलिङ प्रयोग गरेर विपद् जोखिम व्यवस्थापनलाई बढावा दिने।
समावेशीकरणः स्वरोजगार कामदार, किसान र जोखिममा परेका समूहहरुसहित सबै मानिसका लागि समान रुपमा पहुँचयोग्य मौलिक अधिकारका रुपमा बीमालाई प्रवर्द्धन गर्ने।
प्रविधि र डाटाबाट सञ्चालितः खुला बीमा नीतिहरु अगाडि बढाउने, ई–नीतिहर प्रवर्द्धन गर्ने र दीर्घकालीन रुपमा थाई बीमा प्रणालीको पारदर्शिता र दक्षता बढाउन नियमनमा डिजिटल प्रविधिको प्रयोग गर्ने।
फेब्रुअरी ३ मा योजनाको सुरुआतमा बीमा विकास योजना अग्रिम उपसमितिका अध्यक्ष बुन्यारित कल्याणमितद्वारा ‘राष्ट्रिय जोखिम व्यवस्थापनमा बीमा प्रणालीको भूमिका’बारे मुख्य व्याख्यान समावेश थियो। उनले थाइल्यान्डले बढ्दो आर्थिक अस्थिरता, गम्भीर प्राकृतिक प्रकोप, जनसांख्यिकीय परिवर्तन र अन्य उदीयमान जोखिमको सामना गरिरहेकोले बीमा क्षेत्रलाई प्रतिक्रियाशील दृष्टिकोणबाट सक्रिय ‘राष्ट्रिय जोखिम बफर’मा जान आवश्यक रहेको औँल्याए। ‘यसले झट्काहरु अवशोषित गर्न सक्छ र आर्थिक तथा सामाजिक स्थिरतालाई समर्थन गर्न सक्छ’, उनले भने।
योजनाको प्रभावकारी कार्यान्वयन सुनिश्चित गर्न आयोगले हाल सम्बन्धित विभागहरु र अन्य सरोकारवालाहरसँग समन्वय गरिरहेको छ। पूर्ण रुपमा कार्यान्वयन भएपछि योजनाले थाई बीमा उद्योगलाई प्रविधिबाट सञ्चालित, डाटाबाट सूचित र दिगो क्षेत्रीय लिडरका रुपमा स्थापित गर्ने, नागरिकलाई सुरक्षा र विश्वास प्रदान गर्ने तथा ठूला स्तरका आर्थिक र सामाजिक चुनौतीलाई सम्बोधन गर्ने देशको क्षमतालाई सुदृढ पार्ने लक्ष्य राखेको छ। –एजेन्सी
