काठमाडौं । श्रीनगर एग्रीटेक इन्डस्ट्रिजको आइपीओमा उद्योग प्रभावित स्थानीयले आवेदन दिने म्याद थप गरिएको छ।
कम्पनीले गत भदौ ११ गतेबाट पहिलो चरणमा उद्योग प्रभावित क्षेत्रका स्थानीय र वैदेशिक रोजगारीकका लागि आइपीओ बिक्री खुला गरेको थियो। यो आइपीओमा वैदेशिक रोजगारमा रहेका नेपालीले गत भदौ १५ गतेसम्म आवेदन दिने व्यवस्था रहेको थियो। स्थानीयलाई भने भदौ २५ गतेसम्म आवेदन म्याद रहेकोमा अब २ दिन थप गरेर भदौ ३१ गतेसम्म कायम गरिएको हो।
नेपाल धितोपत्र बोर्डबाट कम्पनीले जारी पुँजी १ अर्ब ६३ करोड १२ लाख ५० हजार रुपैयाँको २० प्रतिशत अर्थात ३२ करोड ६२ लाख ५० हजार रुपैयाँबराबरको आइपीओ ल्याउन अनुमति पाएको छ। जसअनुसार कम्पनीले १०० रुपैयाँ अंकित दरका कुल ३२ लाख ६२ हजार ५०० कित्ता शेयर निष्कासन गर्नेछ।
कम्पनी जारी पुँजीको १ प्रतिशतले हुन आउने १ करोड ६३ लाख १२ हजार ५०० रुपैयाँबराबरको १ लाख ६३ हजार १२५ कित्ता शेयर उद्योग प्रभावित क्षेत्रका स्थानीयका लागि निष्कासन गरेको छ। यो आइपीओमा रुपन्देही र पाल्पा जिल्लाका स्थानीयले खरिद आवेदन पेस गर्न सक्नेछन्।
स्थानीयले यो आइपीओमा न्यूनतम १० कित्ता र अधिकतममा १० हजार कित्ताका लागि आवेदन दिन सक्नेछन्। स्थानीयले नबिल बैंकका तानसेन, पाल्पा र फरसाटिकर शाखा, एनएमबि बैंकका तानसेन र फरसाटिकर शाखा तथा ग्लोबल आइएमई बैंकको तानसेनबाट आवेदन दिन सक्नेछन्। वैदेशिक रोजगारीमा रहेका नेपालीले भने नेपाल धितोपत्र बोर्डबाट अनुमति प्राप्त आस्बा सेवा बैंक तथा वित्तीय संस्था र तिनका तोकिएका शाखा कार्यालयबाट सी–आस्बा प्रणालीमार्फत र सीडीएससीको मेरो शेयरबाट आवेदन दिन सक्नेछन्।
श्रीनगर एग्रीटेक इन्डस्ट्रिजको आइपीओ बिक्री प्रबन्धकमा नबिल इम्भेस्टमेन्ट बैंकिङ रहेको छ।
