काठमाडौं । एसवाई प्यानलको शेयर नेपालको शेयर भोलि बुधबारबाट दोस्रो बजारमा कारोबारमा आउने भएको छ।
एसवाई प्यानलको शेयर आज नेपाल स्टक एक्सचेन्ज (नेप्से)मा सूचीकृत भएको छ। कुनै पनि कम्पनीको साधारण शेयर नेप्सेमा सूचीकृत भएको दोस्रो दिनबाट कारोबार आउने भएकोले यो कम्पनीको शेयर भोलिबाट कारोबारमा आउने भएको हो।
नेप्सेमा एसवाई प्यानलको कुल १ करोड ३० लाख ८१ हजार ३७१ कित्ता शेयर सूचीकृत भएको छ। जसमा सर्वसाधारणको ५२ लाख ३२ हजार ५४८ कित्ता (४० प्रतिशत) र संस्थापकको ७८ लाख ४८ हजार ८२३ कित्ता (६० प्रतिशत) रहेको छ।
नेप्सेले एसवाई प्यानललाई ‘एसर्वापीएनएल’ कारोबार संकेत प्रदान गरेको छ। पहिलो कारोबारका लागि भने यो कम्पनीले प्रतिकित्ता न्यूनतम १०६.६१ रुपैयाँदेखि अधिकतम ३१९.८३ रुपैयाँ ओपनिङ रेन्ज पाएको छ।
अब भोलि स्पेसल प्रि–ओपन सेसनमा यदि यो कम्पनीको शेयर दिइएको रेन्जभित्र कारोबार भएमा नियमित सत्रका लागि कारोबारमा आउनेछ।
एसवाई प्यानलले गत कात्तिक १९ गतेदेखि कात्तिक २३ गतेसम्म सर्वसाधारणलाई आइपीओ बिक्री खुला गरेको थियो। यो आइपीओ धितोपत्र बिक्री प्रबन्धक प्रभु क्यापिटलको कार्यालयमा गत कात्तिक ३० गते बाँडफाँट गरिएको थियो।
