काठमाडौं । नेपाल धितोपत्र बोर्डले मर्चेन्ट बैंकहरुको अन्डरराटिङ सीमा बढाएको छ।
धितोपत्र बोर्डको सञ्चालक समितिको बैठकले बैंक, वित्तीय संस्था र बीमा कम्पनीका सहायक कम्पनीमार्फत हुने धितोपत्र प्रत्याभूति (अन्डरराइटिङ)को अधिकतम सीमा बढाउने निर्णय गरेको प्रवक्ता निरञ्जय घिमिरेले जानकारी दिए। ‘हाल मर्चेन्ट बैंकले आफ्नो नेटवर्थको ३ गुणासम्मको रकमबराबरको धितोपत्र मात्रै अन्डरराइटिङ गर्न पाउने व्यवस्था छ’, घिमिरेले भने, ‘त्यो व्यवस्था यथावत राख्दै बैंक, वित्तीय संस्था र बीमा कम्पनीका सहायक कम्पनीले भने अब माउ कम्पनीकै नेटवर्थबराबरको अन्डरराइटिङ गर्न पाउने व्यवस्था गरिएको छ । तर, यसका लागि माउ कम्पनीले दायित्व व्यहोर्ने सुनिश्चितता गर्नुपर्ने प्रावधान तोकिएको छ।’
धितोपत्र व्यवसायी (मर्चेन्ट बैंकर) नियमावली, २०६४ को अनुसूची ९ को (ग) मा अन्डरराइटर (प्रत्याभूतिकर्ता)ले अन्तिम लेखापरीक्षण भएको नेटवर्थको ३ गुणासम्म अन्तरराइटिङ गर्न सक्ने र लगानी व्यवस्थापकले अन्तिम लेखापरीक्षण भएको नेटवर्थको १५ गुणासम्म लगानी व्यवस्थापन गने सक्ने व्यवस्था छ।
धितोपत्र बोर्डका चैत ७ गतेको निर्णयपछि उक्त अनुसूचीमा ‘तर, बैंक तथा वित्तीय संस्था वा बीमा कम्पनीका सहायक कम्पनी र त्यस्ता कम्पनीको मुख्य कम्पनीबीच मुख्य कम्पनीले दायित्व सकार्ने गरी करार सम्झौता भएको अवस्थामा मुख्य कम्पनीको पछिल्लो लेखारीक्षण भएको वित्तीय विवरणबमोजिमको नेटवर्थमा नबढ्ने गरी अन्डरराइटिङ गर्न सक्ने’ व्यवस्था थप गरिएको छ।
