काठमाडौं । पछिल्लो समय आवासीय व्यक्तिगत घर कर्जामा आकर्षण बढ्दै गएको छ।
नेपाल राष्ट्र बैंकले यो कर्जा बैंकहरुले अधिकतम २ करोड रुपैयाँ प्रवाह गर्न पाउने प्रावधान तोकेको छ। केन्द्रीय बैंककै तथ्यांकअनुसार चालु आर्थिक वर्ष २०८२।८३ को पहिलो ५ महिना मंसिरसम्म बैंकबाट करिब साढे ४ खर्ब रुपैयाँ यो शीर्षकमा कर्जा प्रवाह भएको छ।
तथ्यांकअनुसार बैंकहरुले आवासीय व्यक्तिगत घर कर्जा शीर्षकमा मंसिरसम्म ४ खर्ब ४४ अर्ब करोड ९१ लाख रुपैयाँ प्रवाह गरेका छन्। गत आर्थिक वर्ष २०८१।८२ को यही अवधिसम्म बैंकहरुले यो शीर्षकमा ३ खर्ब ९८ अर्ब १५ करोड ३२ लाख रुपैयाँ कर्जा प्रवाह गरेका थिए। गत वर्षको तुलनामा समीक्षा अवधिसम्म कर्जा प्रवाह ११.७४ प्रतिशतले बढेको छ।
यसैगरी चालु वर्षको मंसिरसम्म बैंकहरुले घरजग्गा कर्जातर्फ २ खर्ब ७४ अर्ब ५१ करोड ३ लाख रुपैयाँ प्रवाह गरेका छन्। गत वर्ष यही अवधिसम्म बैंकले यस शीर्षकमा २ खर्ब ७७ अर्ब ३३ करोड ९३ लाख रुपैयाँ कर्जा दिएका थिए। गत वर्षको तुलनामा समीक्षा अवधिमा यो शीर्षकमा कर्जा प्रवाह १.०२ प्रतिशतले घटेको छ।
