काठमाडौं । पहलगाम आतंकवादी हमलापछि भारत र पाकिस्तानबीचको तनाव चरम सीमामा पुगेको छ। भारतले पाकिस्तानबाट आयातमा पूर्ण प्रतिबन्ध लगाएको र पाकिस्तानी जहाजलाई भारतीय बन्दरगाहमा प्रवेश गर्न प्रतिबन्ध लगाएको केही घन्टापछि पाकिस्तानले पनि भारतीय जहाजका लागि आफ्नो बन्दरगाह बन्द गरेको छ।
पाकिस्तानी समाचार एजेन्सी डनका अनुसार पाकिस्तानी समुद्री मामिला मन्त्रालयको बन्दरगाह तथा ढुवानी शाखाले शनिबार राति अबेर एक आदेश जारी गर्दै समुद्री अवस्थालाई ध्यानमा राख्दै पाकिस्तानले आफ्नो समुद्री सार्वभौमसत्ता, आर्थिक हित र राष्ट्रिय सुरक्षाको रक्षा गर्न तत्काल प्रभावले धेरै कदम चाल्ने जनाएको छ। जसमा भारतीय झन्डावाहक जहाज कुनै पनि पाकिस्तानी बन्दरगाहमा आउन सक्ने छैनन्।
यसअघि भारत सरकारले कडा निर्णय लिएर पाकिस्तानबाट वा पाकिस्तान हुँदै आउने सबै प्रकारका आयातित सामानमा प्रतिबन्ध लगाएको थियो। पाकिस्तानी जहाजहरुलाई भारतीय बन्दरगाहमा प्रवेश गर्न पनि प्रतिबन्ध लगाइएको थियो। यसका साथै पाकिस्तानी बन्दरगाहमा यात्रा गर्ने भारतीय जहाजमा पनि प्रतिबन्ध लगाइएको थियो। यससँगै भारतले पाकिस्तानसँगको हुलाक र पार्सल सेवा पनि बन्द गरेको छ।
भारत सरकारले यो निर्णय अप्रिल २२ मा पहलगाममा भएको आतंकवादी हमलापछि लिएको हो। जसमा २६ जनाको ज्यान गएको थियो। तीमध्ये धेरैजसो पर्यटक थिए।
भारतले यसलाई आतंकवादको जघन्य कार्य मात्र भनेन तर आतंकवाद र यसका समर्थकविरुद्ध निर्णायक र ठोस कारबाही गर्न प्रतिबद्ध रहेको पनि जनाएको छ।
