काठमाडौं । नेपाल राष्ट्र बैंकले एउटा विशेष अवस्तामा सवारीसाधन कर्जामा लचक व्यवस्था ल्याएको छ।
केन्द्रीय बैंकले आज बैंक तथा वित्तीय संस्थाका नाममा जारी एकीकृत निर्देशनमा संशोधन गर्दै लचक व्यवस्था ल्याएको हो। हाल बैंक तथा वित्तीय संस्थाले सबै प्रयोजनका लागि विद्युतीय सवारीसाधन वा निजी प्रयोजनका लागि व्यक्तिगत अन्य सवारीसाधन खरिद गर्न कर्जा प्रवाह गर्दा सवारीसाधनको ऋण मूल्यको अनुपात अधिकतम ६० प्रतिशतसम्म मात्र कायम गर्नुपर्ने व्यवस्था रहेको छ।
संशोधित व्यवस्थाबमोजिम अब सार्वजनिक यातायातको रुपमा प्रयोग हुने यात्रुबाहक ठूला विद्युतीय सवारीसाधनका लागि कर्जा प्रवाह गर्दा तथा जेनजी आन्दोलनबाट प्रत्यक्ष रुपमा प्रभावित उद्योग तथा व्यावसायिक प्रतिष्ठानमा व्यावसायिक रुपमा प्रयोग भइरहेका सवारी तथा ढुवानीका साधन क्षति भई प्रतिस्थापन गर्न कर्जा प्रदान गर्दा ऋण मूल्य अनुपात ८० प्रतिशतसम्म कायम गर्न सकिने व्यवस्था राष्ट्र बैंकले गरेको छ।
