काठमाडौं । अर्थमन्त्री डा स्वर्णिम वाग्लेले अन्तर्राष्ट्रिय लक्जरी होटल ब्रान्ड ‘द रिट्च कार्लटन’ नेपाल भित्रिनु सुखद् भएको बताएका छन्।
अर्थ मन्त्रालयमा सोमबार म्यारियट इनटरनेसनलका अध्यक्ष डेभिस म्यारियट र नेपाली साझेदार चौधरी समूहका व्यवस्थापकहरुसँगको भेटमा अर्थमन्त्री वाग्लेले यस्तो धारणा राखेका हुन्। काठमाडौंको ठमेलमा चौधरी समूहसँगको साझेदारीमा द रिट्च कार्लटन होटल सञ्चालन गर्ने घोषणा गरेको दोस्रो दिन अर्थमन्त्री वाग्ले र उनीहरुबीच मन्त्रालयमा भेटघाट भएको हो।
भेटमा अर्थमन्त्री डवाग्लेले अध्यक्ष डेभिस म्यारियटलाई नेपालमा व्यवसाय विस्तार गरेर विश्वका धनाढ्यहरुका नेपाल गन्तव्य थपिदिएकामा धन्यवाद दिए। द रिट्च कार्लटनको उपस्थितिले विश्वका अर्बपतिहरुको गन्तव्य नेपाल बन्न सक्ने पनि उनको भनाइ थियो। ‘तपाइँहरुको नयाँ परियोजना घोषणाले लगानीकर्ताका लागि नयाँ उत्साह थपेको छ। नेपालमा लगानी भित्र्याउन र विश्वका धनाढ्यहरुले अब नेपालको द रिट्च कार्लटनलाई आफ्नो गन्तव्य बनाउन सक्छन् भन्ने सोच विकास भएको छ’, उनले भने, ‘यसले नेपालको पर्यटनलाई अर्को उचाइ दिन सक्छ।’
नयाँ सरकारले लगानी मैत्री वातावरणका लागि काम गरिरहेको भन्दै अर्थमन्त्री वाग्लेले म्यारियट र द रिट्च कार्लटनलाई काठमाडौँ बाहिर पनि व्यवसाय विस्तार गर्न आग्रह गरे। लगानी सुरक्षा र प्रवर्द्धनका लागि आवश्यक पूर्वाधार एवं कानुनी सहजीकरणमा सरकारले पूर्ण सहयोग गर्ने वचन पनि उनले लगानीकर्ताहरुलाई दिए। ‘सरकार तपाइँहरुको लगानीको सुरक्षाका लागि प्रतिवद्ध छ। व्यवसाय विस्तार गर्न चाहिने हवाई र स्थलगत पूर्वाधार विकास हाम्रो प्राथमिकतामा छन्’, उनले भने, ‘तपाइँहरु नेपालको ब्रान्डिङ गर्नुहोस्। मलाई लाग्छ अब विश्वका अर्बपतिहरुको गन्तव्य नेपाल पनि बन्न सक्छ।’
अर्थमन्त्रीसँगको भेटमा अध्यक्ष डेभिस म्यारियटले नेपालको विश्वस्तरीय पथ प्रदर्शक गन्तव्य र हिमालको देश भएको र त्यसलाई विश्व बजारमा थप फैलाउने काम द रिट्च कार्लटनले गर्ने बताए। नेपालमा द रिट्च कार्लटन घोषणा गर्न पाउँदा अत्यन्तै खुसी मिलेको भन्दै उनले थप लगानी विस्तार गर्ने प्रतिबद्धता पनि जनाए। ‘नेपाल प्रचुर पर्यटन सम्भावनाको देश हो। विश्वस्तरीय ट्रेकिङ गन्तव्य र हिमालको देशलाई द रिट्च कार्लटनको उपस्थितिले सुखद् सन्देश दिनेछ’, उनले भने।
भेटमा सीजी हस्पिटालिटी होल्डिङस् तथा सीजी क्रप ग्लोबलका प्रबन्ध निर्देशक राहुल चौधरीले नेपाल लगानी अवसरहरुको प्रचुर सम्भावनाको मुलुक रहेको बताए। नयाँ सरकार बनेपछि लगानीकर्तामा उत्साह थपिएको भन्दै उनले सरकारबाट यथेष्ट साथ र सहयोग अपरिहार्य रहेको बताए।
भेटमा सीजी क्रप ग्लोबलका प्रबन्ध निर्देशक निर्वाण चौधरी र म्यारियट एशिया प्याशेफिक (चीन बाहेक) का अध्यक्ष राजीव मेनन र अर्थमन्त्रीको सचिवालयका प्रतिनिधि सहभागी थिए।
