काठमाडौं । सरकारहरुमाथि जनताको विश्वास घट्दै जाँदा बीमा कम्पनीहरुले विश्वव्यापी चुनौतीहरुलाई सम्बोधन गर्न महत्वपूर्ण भूमिका खेलिरहेका छन्।
इप्सोससँगको सहकार्यमा एएक्सएले तयार पारेको १२ औँ भविष्य जोखिम प्रतिवेदनले यस्तो उजागर गरेको हो। प्रतिवेदनअनुसार ८९ प्रतिशत विज्ञ र ७२ प्रतिशत जनताले जलवायु परिवर्तन, साइबर सुरक्षा र भूराजनीतिक अस्थिरताजस्ता उदीयमान जोखिम व्यवस्थापन गर्न बीमा क्षेत्रले निर्णायक भूमिका खेल्ने विश्वास गरेका छन्।
यसको तुलनामा केवल ६१ प्रतिशतले राष्ट्रिय अधिकारीहरुमा समान विश्वास व्यक्त गरिएको प्रतिवेदनमा उल्लेख छ। सन् २०२१ देखि नयाँ संकटहरुलाई कम गर्न बीमा कम्पनीहरुमा विश्वास ३ प्रतिशतको अंकले बढेको छ।
यसका बाबजुद अध्ययनले सामाजिक विभाजनको बढ्दो भावनालाई पनि उजागर गरेको छ। लगभग ९३ प्रतिशत उत्तरदाताहरु विश्वास गर्छन् कि संकटहरुको संख्या बढ्दै गएको छ।
एएक्सएका प्रमुख कार्यकारी अधिकृत थोमस बुबरलका अनुसार बीमा कम्पनीहरुले विश्वव्यापी तयारीलाई बलियो बनाउन नवीनता र रोकथामलाई संयोजन गरेर ‘लचिलोपनका आर्किटेक्ट’का रुपमा काम गर्नुपर्छ।
विज्ञ (८६ प्रतिशत) र आमजनता (८४ प्रतिशत) दुवैले कडा रोकथाम उपायहरुमार्फत धेरै प्रमुख जोखिमलाई आंशिक रुपमा बेवास्ता गर्न सकिन्छ भन्ने कुरामा सहमति जनाएका छन्।
