काठमाडौं । हालैको जेनजी आन्दोलनका क्रममा भएका भौतिक तथा अन्य क्षतिको निर्जीवन बीमा कम्पनीहरुले कुल ३ हजार ३१६ वटा बीमा दाबीको करिब २३ अर्ब ४७ करोड रुपैयाँ दाबी रकम भुक्तानी गर्नुपर्ने देखिएको छ। हालसम्म कम्पनीहरुले त्यसमध्ये अग्रिम भुक्तानीसमेत गरी करिब ५ अर्ब ४८ करोड २५ लाख रुपैयाँ बीमितहरुलाई भुक्तानी गरिसकेको अद्यावधिक तथ्यांकक बीमा कम्पनीहरुबाट प्राप्त भएको नेपाल बीमा प्राधिकरणले जनाएको छ।
प्राधिकरणमा १४ वटा निर्जीवन बीमा कम्पनी र ४ वटा लघु निर्जीवन बीमा कम्पनीबाट प्राप्त अद्यावधिक तथ्यांकअनुसार कम्पनीहरुबाट अग्रिम भुक्तानीसमेत गरी भुक्तानी भएको कुल दाबी रकममध्ये सम्पत्ति बीमातर्फ कुल ७१२ वटा दाबीको करिब १९ अर्ब ५ करोड रुपैयाँमध्ये करिब ३ अर्ब ९३ करोड ५९ लाख रुपैयाँ र मोटर बीमातर्फ कुल २ हजार ३२१ वटा दाबीको करिब ३ अर्ब ४६ करोड १६ लाख रुपैयाँमध्ये करिब १ अर्ब ३९ करोड २५ लाख रुपैयाँ भुक्तानी भएको छ।
यसैगरी इन्जिनियरिङ तथा ठेक्का जोखिम बीमातर्फ कुल २२६ वटा दाबीको करिब ५५ करोड ३९ लाख रुपैयाँमध्ये करिब ८ करोड ३६ लाख रुपैयाँ, परिवहन बीमातर्फ कुल १२ वटा दाबीको करिब १ करोड ६९ लाख रुपैयाँमध्ये करिब १ करोड ५५ लाख रुपैयाँ र अन्य बीमातर्फ कुल ४५ वटा दाबीको करिब ३८ करोड ४० लाख रुपैयाँमध्ये करिब ५ करोड रुपैयाँ अग्रिम भुक्तानीसमेत दाबी भुक्तानी भएको प्राधिकरणले जनाएको छ।
जेनजी आन्दोलनका क्रममा भएका भौतिक तथा अन्य क्षतिको बीमा दाबी भुक्तानीका लागि नेपाल पुनर्बीमा कम्पनीले निर्जीवन बीमा कम्पनीहरुलाई कुल करिब ३ अर्ब २ करोड रुपैयाँ अग्रिम भुक्तानीसहित पुनर्बीमा दाबी भुक्तानी गरेको छ। नेपाल पुनर्बीमा कम्पनीमा विभिन्न १४ वटा निर्जीवन बीमा कम्पनीबाट परेका कुल २ हजार ८६३ वटा पुनर्बीमा दाबीको कुल भुक्तानी गर्नुपर्ने रकम करिब १६ अर्ब ६२ करोड ६६ लाख रुपैयाँ रहेको अद्यावधिक तथ्यांक कम्पनीबाट प्राप्त भएको प्राधिकरणले जनाएको छ।
