काठमाडौं । नेपाली बीमा प्राधिकरणले चालु आर्थिक वर्ष २०८२।८३ साउनमा डेढ दर्जन बढी उजुरी फर्छ्यौट गरेको छ।
प्राधिकरणले सार्वजनिक मासिक बीमा प्रतिविम्बअनुसार प्राधिकरणमा परेका उजुरीमध्ये १९ वटा फर्छ्यौट भएको हो। अझै ३९३ वटा उजुरी बाँकी रहेको प्राधिकरणले जनाएको छ।
प्राधिकरणका अनुसार गत आर्थिक वर्ष २०८१।८२ बाट सरेर आएको उजुरीको संख्या ३९४ वटा रहेको छ। चालु आर्थिक वर्षको साउनमा प्राधिकरणको केन्द्रीय कार्यालयमा १४ वटा प्रदेश कार्यालयमा ४ वटा गरी जम्मा १८ वटा उजुरी परेका छन्।
साउनसम्म प्राधिकरणमा परेको कुल उजुरी संख्या ४१२ रहेको थियो। त्यसमध्ये १६ वटा उजुरीको फैसला र ३ वटाको सहमति गरी १९ वटा उजुरी फर्छ्यौट भएको प्राधिकरणले जनाएको छ।
गत आर्थिक वर्षभरि प्राधिकरणले १३१ वटा उजुरी फर्छ्यौट गरेको थियो। जसमा ८५ वटा उजुरी फैसला र ४६ वटा उजुरी सहमतिमा टुंगो लगाइएको थियो।
