काठमाडौं । सन् २०२५ मा एसिया प्रशान्त क्षेत्रमा प्राकृतिक प्रकोपबाट हुने अनुमानित क्षति ७६ अर्ब डलर रहेको थियो। जसमध्ये केवल १० प्रतिशत अर्थात् ७ अर्ब डलरबराबरको मात्र बीमा गरिएको थियो। यसको मतलब ६९ अर्ब डलरबराबरको क्षतिको बीमा गरिएको थिएन।
एअनको सन् २०२६ जलवायु र प्रकोप इनसाइट प्रतिवेदनअनुसार म्यानमारको भूकम्प वर्ष २०२५ को सबैभन्दा महँगो घटना थियो। जसले गर्दा १६ अर्ब डलरको आर्थिक क्षति भयो। तर, त्यसमध्ये केवल १ अर्ब ६० करोड डलरबराबरको मात्र बीमा गरिएको थियो।
म्यानमारमा ७.७ म्याग्निच्युडको भूकम्पले लगभग ५ हजार ५०० मानिसको ज्यान लियो। सन् २०२३ को टर्की–सिरिया भूकम्पपछि सन् २०२५ मा विश्वको सबैभन्दा घातक प्राकृतिक प्रकोप थियो र एसिया प्रशान्त क्षेत्रको कुल आर्थिक क्षतिको २० प्रतिशतभन्दा बढी थियो।
चीन, भारत, पाकिस्तान र दक्षिणपूर्वी एसियामा बाढीका घटनाले घर, पूर्वाधार र कृषिमा उल्लेखनीय क्षति पुर्यायो भने धेरै शक्तिशाली चक्रवातहरुका कारण ठूलो संख्यामा मानिसहरु घरबासविहीन बने। जनधनमा ठूलो क्षति पुग्यो।
समग्र आर्थिक क्षति दीर्घकालीन औसतभन्दा कम भए पनि मानवीय प्रभाव उल्लेखनीय थियो। जसले समग्र विनाशकारी गतिविधि कम भएका वर्षहरुमा पनि प्राकृतिक प्रकोपहरुले निम्त्याउन सक्ने विनाशलाई उजागर पार्छ।
एसिया प्रशान्त क्षेत्रमा कम्तीमा १५ घटनाले १ अर्ब डलरभन्दा बढी आर्थिक क्षति पुर्यायो। जापानमा प्राकृतिक प्रकोपबाट हुने आर्थिक क्षति ७० करोड डलरभन्दा बढी भयो। जसमा बीमा गरिएको क्षति लगभग २९ करोड डलर थियो। जसको परिणामस्वरूप सुरक्षा अन्तर लगभग ५९ प्रतिशत देखियो। – एजेन्सी
