काठमाडौं । पछिल्लो समय बैंकिङ गुनासा बढ्दै गएका छन्। विभिन्न माध्यमबाट बैंकहरुको कामकारबाहीप्रति रुष्ट बनेका ग्राहकले आफ्नो पीडा पोख्दै आएका छन्।
नेपाल राष्ट्र बैंकले भने बैंकिङ गुनासा संस्थागत माध्यमबाट समाधान गर्न विभिन्न प्रावधान निर्धारण छ। यसबारे केन्द्रीय बैंकले वित्तीय चेतनाका लागि एउटा सूचना नै जारी गरेको छ।
बैंक तथा वित्तीय संस्थाहरुमा गुनासो सुन्ने अधिकारीको व्यवस्था हुनुका साथै संस्थाको वेबसाइटमा गुनासो पोर्टलसमेत राखिएको हुन्छ। गुनासो सम्बोधनका लागि गुनासो अधिकारीसँग सम्पर्क गर्ने वा उक्त पोर्टलमा गुनासो दर्ता गर्न सकिन्छ।
वित्तीय सेवा प्रदायकबाट गुनासोको समाधानका लागि भएको कामकारबाही चित्त नबुझेमा वा गुनासो समाधान नभएमा नेपाल राष्ट्र बैंकमा रहेको वित्तीय ग्राहक संरक्षण इकाईमा गुनासो दर्ता गर्न सकिन्छ।
राष्ट्र बैंकले तल उल्लेखित माध्यमबाट गुनासो दर्ता गर्न सकिने व्यवस्था गरेको छ।
- नेपाल राष्ट्र बैंकको अनलाइन पोर्टल www.gunaso.nrb.org.np मा गुनासो दर्ता गर्न सकिन्छ।
- राष्ट्र बैंकलाई सम्बोधन गरी लिखित निवेदनमार्फत पनि गुनासो पेस गर्न सकिन्छ।
- अन्य माध्यम जस्तै– ई–मेल, टेलिफोन तथा राष्ट्र बैंकमा स्वयं उपस्थित भई गुनासो टिपाउन वा दर्ता गर्न सकिने व्यवस्था रहेको छ।
- लघुवित्त सेवासम्बन्धी गुनासोलाई व्यवस्थापन गर्नका लागि माथि उल्लेखित व्यवस्थाको अतिरिक्त लघुवित्त संस्था सुपरिवेक्षण विभागमा अलग्गै गुनासो डेस्क स्थापना गरी टोल फ्री नम्बर र अलग्गै हटलाइनको व्यवस्था पनि गरिएको छ।
बैंक तथा वित्तीय संस्थाको कामकारबाहीसम्बन्धी कुनै गुनासा भए संस्थागत माध्यमबाट समाधानका लागि समयमै पहल गर्न पनि राष्ट्र बैंकले आग्रह गरेको छ।
