काठमाडौं । बैंकहरुले अब सञ्चालक, प्रमुख कार्यकारी अधिकृत (सीईओ) र उच्च व्यवस्थापकीय पदमा नियुक्ति वा मनोनयन गर्दा १० महत्वपूर्ण विवरण लिनुपर्ने भएको छ।
नेपाल राष्ट्र बैंकले बैंक तथा वित्तीय संस्थाका नाममा जारी एकीकृत निर्देशनमा संशोधन गर्दै बैंक तथा वित्तीय संस्थाले सञ्चालक, सीईओ र उच्च व्यवस्थापकीय पदमा नियुक्ति गर्दा महत्वपूर्ण विवरण लिनुपर्ने प्रावधान थप गरेको हो। यसअघि यस्तो प्रावधान रहेको थिएन।
यस्ता छन् विवरण
- सम्बन्धित व्यवसायसम्बन्धी प्रचलित कानुनबमोजिमको मापदण्ड पालना गरेको स्वघोषणा,
- सम्बन्धित व्यक्तिको पारिवारिक विवरण,
- नेपाल वा विदेशमा कुनै कसूरमा संलग्न भए वा नभएको स्वघोषणा। यदि संलग्न भएको भए सोको विस्तृत विवरण र वर्तमान अवस्था,
- कुनै प्रकारको मुद्दा मामिला, अनुसन्धान, वैकल्पिक विवाद समाधानको प्रक्रिया वा न्यायिक वा प्रशासनिक कारबाहीको प्रक्रियामा रहे वा नरहेको स्वघोषणा । यदि भएको भए सोको विवरण,
- अदालत वा अधिकारप्राप्त अधिकारीको फैसला वा आदेशबमोजिम तिर्नु, बुझाउनुपर्ने राजस्व, सरकारी बाँकी बक्यौता रहे वा नरहेको स्वघोषणा,
- स्वदेश वा विदेशमा कर्जा सम्बन्धी कालोसूची वा त्यस्तै प्रकारको सूचीमा परे वा नपरेको स्वघोषणा,
- स्वार्थको द्वन्द्व हुन सक्ने अवस्था विद्यमान रहे वा नरहेको विवरण,
- नेपाली नागरिक भए निजको नेपाल बाहिर कुनै सम्पत्ति रहे वा नरहेको वा कुनै सम्पत्तिमा वास्तविक धनी वा हिताधिकारी भए वा नभएको स्वघोषणा,
- विगतमा संलग्न भएको कार्य, संस्था, प्राप्त भएको जिम्मेवारी, पुरस्कार, सजायको अवस्था, कार्य सफलताको उदाहरणलगायतका विषय खुल्ने सम्बन्धित क्षेत्रको कार्य अनुभवसम्बन्धी विवरण,
- वित्तीय आचरण (फाइनान्सियल साउन्डनेस) सम्बन्धी विवरण।
यो निर्देशन जारी हुँदाका बखत बहालमा रहेका सञ्चालक, सीईओ तथा उच्च व्यवस्थापन तहको पदाधिकारीको हकमा माथिका विवरण लिई नेपाल राष्ट बैंकसमक्ष पेस गर्नुपर्नेछ । विवरण परिवर्तन भएमा समेत अद्यावधिक विवरण लिई केन्द्रीय बैंकसमक्ष पेस गर्नुपर्नेछ ।
