काठमाडौं । एकैदिन रेडर्कतोड संख्यामा बीमा पोलिसी बेचेर गिनिज वर्ल्ड रेकर्डमा नाम लेखाउन सफल भारतको सबैभन्दा ठूलो बीमा कम्पनी एलआईसीले आफ्नो चौथो त्रैमासको नतिजा सार्वजनिक गरेको छ।
नतिजा घोषणा गर्दै एलआईसीले जनवरी–मार्च त्रैमासिकमा भारु १ खर्ब ९० अर्ब १३ करोड खुद नाफा कमाएको जनाएको छ। यसले वार्षिक आधारमा ३८ प्रतिशतले वृद्धि देखाउँछ। अघिल्लो आर्थिक वर्षमा एलआईसीको खुद नाफा भारु १ खर्ब ३७ अर्ब ६३ करोड थियो।
नतिजा घोषणा गर्नुका साथै एलआईसीले वित्त वर्ष २०२५ का लागि शेयरधनीहरुलाई प्रतिशेयर भारु १२ लाभांश वितरण गर्ने घोषणा पनि गरेको छ। यसका लागि रेकर्ड मिति जुलाई २५ तय गरिएको छ।
खुद नाफामा वृद्धि भए पनि मार्च त्रैमासिकमा कम्पनीको खुद आम्दानी अघिल्लो आर्थिक वर्षको तुलनामा घटेको छ। अघिल्लो वर्ष भारु २५ खर्ब ९ अर्ब २३ करोड आम्दानी गरेको समीक्षा अवधिमा घटेर भारु २४ खर्ब १६ अर्ब २५ करोड झरेको छ। कम्पनीले खुद प्रिमियम आम्दानीमा कमी आएका कारण आम्दानीमा घटेको जनाएको छ।
यस वर्ष २० जनवरीमा एलआईसीले एकै दिनमा रेकर्ड संख्यामा पोलिसी बेचेर गिनिज वर्ल्ड रेकर्डमा नाम लेखाउन सफल भएको थियो। केवल २४ घन्टाभित्र कम्पनीका ४ लाख ५२ हजार ८३९ एजेन्टले भारतभरि ५ लाख ८८ हजार १०७ जीवन बीमा पोलिसी बेचेका थिए। –एजेन्सी
