काठमाडौं । विश्वव्यापी तापक्रम वृद्धिले निम्त्याएको बढ्दो खतराका बाबजुद विश्वभरका प्रमुख बीमा कम्पनीहरु जलवायु, जैविक विविधता र सामाजिक जोखिमहरुलाई सम्बोधन गर्न पछाडि रहेको देखिएको छ।
डब्ल्यूडब्ल्यूएफद्वारा समर्थित जिम्मेवार लगानी गैरसरकारी संस्था सेयरएक्सनको नयाँ प्रतिवेदनले यस्तो देखाएको हो। इन्स्योरिङ डिजास्टर बेन्चमार्कको चौथो संस्करणले विश्वका ४० ठूला सम्पत्ति र दुर्घटना बीमा कम्पनीहरुको मूल्यांकन गरिएको थियो। प्रतिवेदनअनुसार धेरैजसो कम्पनीले उनीहरुको जलवायुसँग सम्बन्धित पोलिसीका लागि खराब ग्रेड प्राप्त गरेका छन्। एलियान्ज र अच्मिया बी मूल्यांकन प्राप्त गर्ने एकमात्र बीमा कम्पनीहरु थिए।
प्रतिवेदनका अनुसार बीमा कम्पनीहरुले जलवायु परिवर्तन र जैविक विविधताको क्षतिलाई बढावा दिने पहल र गतिविधिहरुमा अन्डरराइट र लगानी गर्न जारी राखेका छन्। जब कि जलवायुसँग सम्बन्धित प्रकोपहरु बारम्बार र महँगो हुँदै गइरहेका छन्।
सन् २०१५ र २०२४ को बीचमा प्राकृतिक प्रकोपहरुले प्रत्येक वर्ष लगभग २८० अर्ब डलर प्रत्यक्ष आर्थिक नोक्सान निम्त्याएको अनुमान गरिएको छ। यी क्षतिहरुको आधाभन्दा कम बीमाले कभर गरेको छ।
सेयरएक्सनका अनुसार सन् २०२४ मा अघिल्लो बेन्चमार्क प्रकाशित भएदेखि नयाँ जलवायु प्रतिबद्धताहरुमा उद्योगको प्रगति पनि सुस्त भएको छ। ‘बीमा भनेको मानिसहरुलाई प्रकोपबाट मुक्त हुन मद्दत गर्नु हो तर यो अध्ययनले देखाउँछ कि धेरै बीमा कम्पनीहरुले आगोमा घिउ थपिरहेका छन्’, सेयरएक्सनकी नीति निर्देशक लुइस मार्फानीले भनिन्।
मार्फानीका अनुसार बीमा कम्पनीहरुले आफ्नो अन्डरराइटिङ र लगानी निर्णयहरुमार्फत जीवाश्म इन्धन विस्तारलाई समर्थन गरेर जलवायु जोखिमलाई बढाइरहेका छन्। जसले डढेलो, आँधीबेहरी र बाढीलाई बढाइरहेको छ। जब कि केही क्षेत्रहरुमा बीमालाई महँगो वा अनुपलब्ध बनाउँदैछ।
प्रतिवेदनले बीमा कम्पनीहरुको पोलिसीहरुमा उल्लेखनीय अन्तरहरु रहेको पनि उजागर गरेको छ। ‘७३ प्रतिशतमा अपस्ट्रीम तेल र ग्यास विस्तारमा कुनै अन्डरराइटिङ प्रतिबन्धहरु छैनन् र ३३ प्रतिशतमा कोइलामा कुनै प्रतिबन्धहरु छैनन्’, प्रतिवेदनमा भनिएको छ, ‘सन्धि पुनर्बीमामा भाग लिने ९० प्रतिशतभन्दा बढी बीमा कम्पनीहरुमा पनि कुनै अन्डरराइटिङ प्रतिबन्धहरु छैनन्। जब कि जैविक विविधतासँग सम्बन्धित अन्डरराइटिङ प्रतिबन्धहरु दुर्लभ छन्।’
लन्डनको लोयड्सका प्रबन्धक एजेन्टहरु सबैभन्दा कमजोर प्रदर्शनकर्ताहरुमध्ये छन्। थोरैले कोइला प्रतिबन्धहरु वा दीर्घकालीन शुद्ध शून्य लक्ष्यहरु अपनाएका छन्।
यसैले गर्दा सेयरएक्सन र डब्ल्यूडब्ल्यूएफले बीमा कम्पनीहरुलाई आफ्नो जलवायु, जैविक विविधता र सामाजिक पोलिसीहरुलाई बलियो बनाउन आग्रह गरेका छन्। संस्थाहरुले सरकारहरुलाई जिम्मेवार उद्योग अभ्यासहरुलाई प्रवर्द्धन गर्न बलियो नियमहरु विकास गर्न पनि आग्रह गरेका छन्। –एजेन्सी
