काठमाडौं । एभरेष्ट कलर लिमिटेडको बिशेष साधारणसभा आज सम्पन्न भएको छ । कौशलटार, भक्तपुर स्थित केन्द्रिय कार्यालयमा सम्पन्न विशेष साधारण सभाले जारी पुँजी वृद्धि गरी रु ३० करोड र सो पुँजीको २६.३३ प्रतिशत (७,९०,००० कित्ता) शेयर रु १०० का दरले सर्वसाधारणलाई आईपीओ जारी गर्ने प्रस्ताव पारित गरेको छ ।
यस अघिको बार्षिक साधारणसभाले प्रतिकित्ता ५० रुपैयाँ आईपीओ जारी गर्ने प्रस्ताव पारित गरेको थियो । आज सम्पन्न विशेष साधारणसभाले आईपीओको प्रतिकित्ता मूल्य संशोधन गरी पुँजी बृद्धि गर्ने निर्णय गरेको हो ।
त्यसैगरी सभाले स्वतन्त्र संचालकमा कपिल देव महत्तोलाई नियुक्त गरेको छ । कम्पनीको संचालक समीतीका अध्यक्ष महेश्वर खनालको अध्यक्षतामा बसेको विशेष साधारण सभाले संचालक समितिले प्रस्ताव गरेका अन्य सामान्य तथा विशेष प्रस्तावहरु पारित गरेको छ ।
न्यू कलर उधोग भन्दा पृथक ढँगले, सँगठीत स्वदेशी युवाहरुको लगानीमा विशेषतः नेपाल तथा नेपालीको भौतिक संरचनामा गुणस्तरीय एभरेष्ट कलर प्रयोग गराई आयात प्रतिस्थापन गर्ने, रोजगारीको सिर्जना गर्ने र आन्तरिक राजस्वमा योगदान पुर्याई देशको सेवा गर्ने प्रमुख उद्देश्य लिएर संचालन भइरहेको कम्पनीलाई केयर रेटींङ्गस नेपाल लिमिटेडले डबल बी माईनस रेटिङ प्रदान गरेको छ ।
