काठमाडौं । एयर इन्डियाको विमान एआई–१७१ गुजरातको अहमदाबादमा आज दुर्घटनाग्रस्त भएको छ। दुर्घटनास्थलबाट आकाशमा कालो धुँवा उडिरहेको देखिएको छ। उद्धार टोली घटनास्थलमा पुगेको छ।
अहमदाबाद विमानस्थलबाट विमान उडेको केही समयपछि यो दुर्घटना भएको थियो। विमानमा चालक दलका सदस्यसहित २४२ जना सवार थिए।
अहमदाबाद प्रहरी नियन्त्रण कक्षले यसको पुष्टि गरेको छ। जानकारीअनुसार यो विमान अहमदाबादबाट लन्डन जाँदै थियो। अहमदाबाद विमानस्थलबाट उडान भरेको केही समयपछि मेघानीनगर नजिकै दुर्घटनाग्रस्त भयो।
बोइङ ७८७ ड्रीमलाइनरको डिजाइन गरिएको आयु ४४ हजार उडान चक्र हो। अर्थात्, जसले ३० देखि ५० वर्षको सम्भावित आयुलाई संकेत गर्छ। जब कि धेरैजसो व्यावसायिक जेट यति लामो समयसम्म सेवामा रहँदैनन्।
७८७ को बलियोपनले फ्लिट र अवकाश योजनामा थप लचिलोपन प्रदान गर्दछ। अहमदाबादमा दुर्घटनाग्रस्त विमान केवल साढे ११ वर्ष पुरानो थियो।
बोइङ ७८७–८ ड्रीमलाइनर एक चौडा, मध्यम आकारको र लामो दूरीको विमान हो। जुन २१०–२५० सिट क्षमताको साथ ८ हजार ५०० समुद्री माइल (९ हजार ८०० माइल) सम्म यात्रा गर्न सक्छ। यो २० प्रतिशत कम इन्धन खपतको साथ डिजाइन गरिएको हो। जुन वातावरणका लागि पनि राम्रो छ।
विमानमा ५९ विदेशी यात्रु रहेको पुष्टि भएको छ। जसमा बेलायतका ५२ जना, पर्चुगलका ६ जना र एकजना क्यानडाका छन्। अन्य सबै भारतीय रहेको प्रारम्भिक अनुसन्धानबाट खुलेको छ। –एजेन्सी
