काठमाडौं । भोटेकोशी नदीमा आइतबार बिहानैदेखि पुनः बाढी बढेपछि सतर्क रहन आग्रह गरिएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले एउटा सूचना जारी गर्दै यस्तो आग्रह गरेको हो। रसुवाको भोटेकोशी नदीमा बाढीको बहाव थप केही बढेको सूचना प्राप्त भएकोले रसुवा, नुवाकोट, धादिंङ, चितवनलगायतका प्रभावित क्षेत्रमा खोज, उद्धार तथा राहतमा खटिएका, तटीय क्षेत्रमा रहेका एवं अन्य सम्बन्धित सबैमा सतर्कता अपनाउन प्राधिकरणले आग्रह गरेको छ।
यसैगरी बाढी पूर्वानुमान महाशाखाका अनुसार पछिल्लो समय धादिङस्थित त्रिशूली नदीमा जलसतह खतराको तहभन्दा ३ मिटर बढेको जनाएको छ। रसुवाको भोटेकोशी नदीबाट आएको बाढीका कारण त्रिशूली नदीमा जलसतह बढेको हो।
गत भदौ १० गते तिब्बततर्फबाट आएको बाढीमा परेकाहरुको खोज तथा उद्धार कार्य चलिरहेका बेला पुनः बाढी बढेपछि सबैलाई सतर्क रहन भनिएको छ।
