काठमाडौं । नेपाल राष्ट्र बैंकले सुविधाजनक नियामकीय प्रावधानका कारण पछिल्लो समय आवासीय व्यक्तिगत घर कर्जामा आकर्षण बढ्दै गएको छ।
राष्ट्र बैंकले यो कर्जा बैंकहरुले अधिकतम २ करोड रुपैयाँ प्रवाह गर्न पाउने प्रावधान तोकेको छ। केन्द्रीय बैंककै तथ्यांकअनुसार चालु आर्थिक वर्ष २०८२।८३ को दोस्रो त्रैमास (साउन–पुस)सम्म बैंकबाट साढे ४ खर्ब रुपैयाँ बढी यो शीर्षकमा कर्जा प्रवाह भएको छ।
तथ्यांकअनुसार बैंकहरुले आवासीय व्यक्तिगत घर कर्जा शीर्षकमा पुससम्म ४ खर्ब ५० अर्ब १ करोड ७१ लाख रुपैयाँ प्रवाह गरेका छन्। गत आर्थिक वर्ष २०८१।८२ को यही अवधिसम्म बैंकहरुले यो शीर्षकमा ४ खर्ब २ अर्ब १७ करोड ११ लाख रुपैयाँ कर्जा प्रवाह गरेका थिए। गत वर्षको तुलनामा समीक्षा अवधिसम्म कर्जा प्रवाह ११.९० प्रतिशतले बढेको छ।
यसैगरी चालु वर्षको पुससम्म बैंकहरुले घरजग्गा कर्जातर्फ २ खर्ब ६१ अर्ब १३ करोड ४७ लाख रुपैयाँ प्रवाह गरेका छन्। गत वर्ष यही अवधिसम्म बैंकले यस शीर्षकमा २ खर्ब ७३ अर्ब ६९ करोड ५६ लाख रुपैयाँ कर्जा दिएका थिए। गत वर्षको तुलनामा समीक्षा अवधिमा यो शीर्षकमा कर्जा प्रवाह भने ४.५९ प्रतिशतले घटेको छ।
