काठमाडौं । बंगलादेशको बीमा विकास तथा नियामक प्राधिकरण (आईडीआरए)ले जीवन बीमा कम्पनीहरुका प्रमुख कार्यकारी अधिकृत (सीईओ)हरुको शैक्षिक योग्यताको प्रमाणपत्र मागेको छ।
आईडीआरएका निर्देशक (जीवन) र उपसचिव देवप्रसाद पालले आज जीवन बीमा कम्पनीहरुको नाममा एउटा परिपत्र जारी गर्दै सीईओहरुको शैक्षिक योग्यताको प्रमाणपत्र पेस गर्न निर्देशन दिएका हुन्। यो निर्देशन बंगलादेशका सबै जीवन बीमा कम्पनीका सीईओ र प्रबन्ध निर्देशकहरुलाई दिइएको हो।
परिपत्रअनुसार सीईओहरुले सबै शैक्षिक योग्यताको प्रमाणपत्र र अंकपत्रसहित अद्यावधिक बायोडाटा पेस गर्नुपर्नेछ। उनीहरुलाई सीईओका रुपमा नियुक्तिका लागि आईडीआरएद्वारा जारी गरिएको स्वीकृति कागजात पनि पेस गर्न भनिएको छ।
आईडीआरएले ती जानकारी र कागजात पेस गर्न तीन कार्य दिन दिएको छ। यसका साथै सीईओहरुलाई आफ्नो जानकारी अनलाइन अद्यावधिक गर्न भनिएको छ। निर्देशनसँगै गुगल फारामको लिंक पनि पठाइएको छ। –एजेन्सी
