काठमाडौं । नेपाल बीमा प्राधिकरणले शाखा ,उपशाखा तथा सम्पर्क कार्यालयहरूको विवरण वेबसाइटमा अध्यावधिक गर्न इजाजत प्राप्त सबै बीमकलाइ निर्देशन जारी गरेको छ।
प्राधिकरणको कर्णाली प्रदेश कार्यालयले बीमित तथा सेवाग्राहीको सुविधाका लागि कम्पनीको वेबसाइटमा सम्पर्क विवरण अध्यावधिक गर्न निर्देशन जारी गरेको हो । प्रादेशिक कार्यालयले बीमकलाइ पठाएको इमेलमा लेखेको छ, कतिपय बीमकहरूको वेबसाइटमा कर्णाली प्रदेश अन्तर्गतका कार्यालयहरूको सम्पर्क विवरण नराखिएको पाइएको हुँदा २०८३ साउन मसान्त भित्र पूर्णरूपमा अध्यावधिक गर्न केन्द्रीय कार्यालयमा समन्वय गर्नुहुन अनुरोध छ।
बीमकले कार्यालय, शाखाको नाम, ठेगाना, फोन नम्बर, इमेल र गुगल म्याप सङ्केत नम्बर, कार्यालय प्रमुखको तस्वीर, नाम, पद, इमेल र मोबाइल नम्बर सहितको विवरण अध्यावधिक गर्नुपर्नेछ।
प्रादेशिक कार्यालयले झुत्रा वा च्यातिएका वा रङ्ग उडेका कार्यालय बोर्ड समेत यथाशक्य छिटो प्रतिस्थापन गर्न निर्देशन दिएको छ।
