काठमाडौं । रसुवा जिल्लामा मंगलबार बिहान देखि आएको बाढीका कारण ९ जनाको ज्यान गइसकेको छ। रसुवाबाट नदीको बाढीले बगाएकोमध्ये एकजनाको शव त्रिशुली नदी किनारमा चितवनमा फेला परेको छ।
नेपाल प्रहरीका अनुसार, २ प्रहरी, ६ चिनियाँ नागरिक र ११ सर्वसाधारण सहित १९ जना अझै पनि हराइ रहेका छन् । सुरक्षाकर्मीले ५७ जनाको जीवितै उद्धार गरेका छन् ।
भोटेकोशी नदीमा आएको भीषण बाढीका कारण धनजनको ठूलो क्षति भएको छ।
नेपाल प्रहरीका अनुसार, बाढीबाट गोसाइकुण्ड गाउँपालिका वडा नम्बर १,२ र ३, आमाछोदिङ्मो वडा नम्बर १,२,४ र ५, उत्तरगया गाउँपालिका वडा नम्बर, २,४ र ५ तथा कालिका गाउँपालिका वडा नम्बर १ सबैभन्दा बढी प्रभावित बनेको छ।
उद्धारका लागि बाढी प्रभावित क्षेत्रमा जिल्ला प्रहरी कार्यालय रसुवाले ३८३ जना प्रहरी परिचालन गरेको छ।
