काठमाडौं । भारतको गुजरातस्थित अहमदाबादमा एयर इन्डियाको विमान दुर्घटना भएको खबर आएको छ। दुर्घटनास्थलबाट आकाशमा कालो धुवाँ उडिरहेको देखिएको छ।
उद्धार टोली घटनास्थल पुगेको छ। अहमदाबाद विमानस्थलबाट विमान उडान भरे लगत्तै यो दुर्घटना भएको बताइएको छ। विमानमा १२ जना चालक दलका सदस्य (दुईपाइलट सहित) र २३० यात्रुसहित २४२ जना सवार थिए। अहमदाबाद प्रहरी नियन्त्रण कक्षले यसको पुष्टि गरेको छ।
यो विमान अहमदाबादबाट लन्डन जाँदै थियो। अहमदाबाद विमानस्थलबाट उडान भरेको केही समयपछि मेघानीनगर नजिकै दुर्घटनाग्रस्त भएको हो।
विमानस्थलबाट मेघानीनगरको दूरी लगभग १५ किलोमिटर छ। दुर्घटना लगत्तै ७ वटा दमकलका गाडी घटनास्थलमा पुगेर आगो निभाउन थालेका छन्।
घटनास्थलमा आपतकालीन प्रतिक्रिया टोली खटाइएको छ। अधिकारीहरुले अझै दुर्घटनाको कारण पुष्टि गरेका छैनन्। दुर्घटनाग्रस्त विमान बोइङको ७८७ ड्रीमलाइनर भएको बताइएको छ। जुन ११ वर्ष पुरानो थियो।
एयर इन्डियाको विमान एआई–१७१ दिल्लीको इन्दिरा गान्धी अन्तर्राष्ट्रिय विमानस्थल (आईजीआई विमानस्थल) बाट अहमदाबादका लागि उडेको थियो। त्यहाँ केही समय रोकिएपछि बिहीबार दिउँसो लन्डनका लागि उडेको थियो र दुर्घटनाग्रस्त भएको थियो। –एजेन्सी
