काठमाडौं । भारतीय बीमा नियामक तथा विकास प्राधिकरण (आईआरडीएआई)ले बीमा कम्पनीहरुलाई एयर इन्डिया विमान दुर्घटनामा मृतकहरुको बीमा दाबीहरु सकेसम्म चाँडो भुक्तानी गर्न निर्देशन दिएको छ।
प्रक्रियागत औपचारिकताहरु उद्धृत गर्दै आईआरडीएआईले विमानमा सवार यात्रुहरुको सूचीमा मृत्यु पुष्टि भएकाहरुको दाबी ढिलाइ वा अस्वीकार नगर्न पनि बीमा कम्पनीहरुलाई निर्देशन दिएको छ। दुर्घटनास्थलमा विमान दुर्घटनामा परेकाहरुको हकमा बीमा नियामकले यस्तो निर्देशन दिएको हो।
बीमा दाबी भुक्तानी प्रक्रियालाई छिटो बनाउन आईआरडीएआईले बीमा कम्पनीहरुलाई सम्बन्धित अधिकारीहरुबाट दुर्घटनामा मृत्यु भएका व्यक्तिहरुको प्रमाणित सूची, स्वास्थ्य बीमा पोलिसी, व्यक्तिगत दुर्घटना पोलिसी र जीवन बीमा पोलिसी जारी गर्नेसम्बन्धी जानकारी प्राप्त गर्ने अधिकार पनि दिएको छ। आईआरडीएआईले बीमा कम्पनीहरुलाई एफआईआर र पोस्टमार्टम रिपोर्टहरु नमाग्न पनि निर्देशन दिएको छ।
यसबाहेक आईआरडीएआईले जीवन बीमा परिषद् र सामान्य जीवन बीमा परिषद्लाई विशेष सेल गठन गर्न पनि निर्देशन दिएको छ। यो सेल बीजे मेडिकल कलेजका पीडितहरुको उपचार भइरहेको अस्पताल नजिकै स्थापना गरिनेछ। प्रत्येक बीमा कम्पनीलाई उच्चस्तरमा एक नोडल अधिकारी नियुक्त गर्न भनिएको छ। यो अधिकारीले संयुक्त सेलसँगको सहकार्यमा आफ्ना बीमा कम्पनीहरुमा आउने दाबीहरुको समाधान गर्नेछ। बीमा नियामकले बीमा कम्पनीहरुलाई जुन १६ देखि अर्को एक महिनासम्म साप्ताहिक रुपमा यस सम्बन्धमा प्रतिवेदन पेस गर्न पनि भनेको छ।
यसैबीच एलआईसी भारत, बजाज एलियान्ज लाइफ इन्स्योरेन्स र एचडीएफसी लाइफलगायतका प्रमुख जीवन बीमा कम्पनीहरुले प्रभावित पोलिसीधारकहरुको बीमा दाबीहरुको समाधान गर्न थालेका छन्।
एलआईसीले पोलिसी दाबीकर्ताको समस्या समाधान गर्न दाबी भुक्तानी प्रक्रियालाई सरल बनाउने घोषणा गरेको छ। बजाज एलियान्जले दाबी भुक्तानीका लागि विशेष टोली पनि गठन गरेको छ। यो टोलीले यस विमान दुर्घटनाबाट प्रभावित व्यक्तिहरुको मृत्यु वा अशक्तताको दाबी भुक्तानीलाई प्राथमिकता दिनेछ।
एचडीएफसी लाइफका अनुसार बीमित वा तिनका कानुनी उत्तराधिकारीहरुद्वारा मनोनित व्यक्तिले स्थानीय प्रशासन, प्रहरी वा अस्पतालहरुद्वारा जारी मृत्युको प्रमाण प्रदान गरेर दाबी प्रक्रिया सुरु गर्न सक्छन्।
