काठमाडौं । अमेरिकी अर्थतन्त्र ठूलो उथलपुथलबाट गुज्रिरहेको छ। राष्ट्रपति डोनाल्ड ट्रम्पले आफ्नो दोस्रो कार्यकालमा द्रुत गतिमा निर्णय लिइरहेका छन्। जसको प्रभाव अमेरिकासहित विश्वभर देखिएको छ।
यसैबीच अमेरिकाको इक्विटी बजारमा शीर्ष १० स्टकको हिस्सा रेकर्ड ७६% पुगेको छ। यसले सन् १९३० को दशकको महामन्दीको रेकर्ड तोडेको छ। सन् २००० को डटकम बबलको समयमा पनि यो ७३% थियो। सन् १९८० को दशकमा अमेरिकाको इक्विटी बजारमा शीर्ष १० स्टकको हिस्सा ५०% भन्दा कम थियो।
विश्वका शीर्ष १० कम्पनीमध्ये ८ अमेरिकाका हुन्। एनभिडियाको बजार पुँजीकरण ४.४०८ ट्रिलियन डलर छ। यस सूचीमा माइक्रोसफ्ट (३.८७१ ट्रिलियन डलर) दोस्रो, एप्पल (३.२६५ ट्रिलियन डलर) तेस्रो, गुगलको मूल कम्पनी अल्फाबेट (२.३८० ट्रिलियन डलर) चौथो, अमेजन (२.३७९ ट्रिलियन डलर) पाँचौँ, मेटा प्लेटफर्म (१.९१३ ट्रिलियन डलर) छैटौँ, ब्रोडकम (१.४२८ ट्रिलियन डलर) आठौँ, टेस्ला (१.०३९ ट्रिलियन डलर) दसौँ, बर्कशायर ह्याथवे (९९९.५९ बिलियन डलर) ११ औँ र वालमार्ट (८२२.९४ बिलियन डलर) १२ औँ स्थानमा छ।
यसैबीच एसएन्डपी ५०० मा शीर्ष १० कम्पनीको हिस्सा पनि सूचकांकको कुल बजार पुँजीकरणको ४०% पुगेको छ। यो आफैँमा एक रेकर्ड पनि हो।
अमेरिकामा धेरै लगानी भित्रिँदैछ। आईफोन निर्माता एप्पलले अमेरिकामा ६०० अर्ब डलरको लगानी घोषणा गरेको छ। यसले अमेरिकामा २० हजार नयाँ रोजगारी सिर्जना गर्ने अपेक्षा गरिएको छ।
त्यस्तै एनभिडियाले २०० अर्ब डलर र टीएसएमले १०० अर्ब डलर लगानी गर्ने घोषणा गरेको छ। त्यस्तै जोनसन एन्ड जोनसन, माइक्रोसफ्ट, एली लिली, इनर्जी क्यापिटल, हुन्डाईजस्ता कम्पनीले पनि अमेरिकामा लगानी घोषणा गरेका छन्। –एजेन्सी
