काठमाण्डौ: गत आर्थिक बर्ष २०७४/७५ मा निक्षेप तथा कर्जा सुरक्षण कोषले ६३ करोड ८५ लाख रुपैयाँ बराबरको पशुधन सुरक्षण गरेको छ । कोषले गत आवमा ९० करोड रुपैयाँ बराबरको पशुधन सुरक्षण हुने अनुमान गरेको थियो ।
उक्त अवधिमा ७ हजार ९ सय ७६ जना कृषक सुरक्षण कार्यक्रममा सहभागी भएका छन् । १० हजार ६ सय ९ वटा पशुधनको सुरक्षण भएको छ । जसबापत कोषले ४ करोड १९ लाख रुपैयाँ बराबरको सुरक्षण शुल्क प्राप्त गरेको छ ।
कोषले सबैभन्दा बढी विराटनगर क्षेत्रमा २४ करोड ३० लाख रुपैयाँ बराबरको पशुधन सुरक्षण गरेको छ । उक्त क्षेत्रका ४ हजार २०५ कृषकको ४ हजार ६ सय ९८ पशुधन सुरक्षण गरिएको छ । जसबापत कोषले १६ हजार ३ सय ८ सुरक्षण शुल्क संकलन गरेको छ ।
चितवन क्षेत्रमा भने कोषले २० करोड ३५ लाख रुपैयाँ बराबरको पशुधन सुरक्षण गरेको छ । उक्त क्षेत्रको १ हजार ४ सय ९१ कृषकको २ हजार ९ सय ३६ पशुधनको सुरक्षण गरिएको छ । जसबापत कोषले १ करोड ३२ लाख रुपैयाँ बराबर सुरक्षण शुल्क संकलन गरेको छ ।
त्यस्तै, बुटवल क्षेत्रमा भने कोषले ८ करोड ७० हजार रुपैयाँ बराबरको पशुधन सुरक्षण गरेको छ । उक्त क्षेत्रका १ हजार ५० कृषकको १ हजार ३ सय ९५ पशुधन सुरक्षण गरिएको छ । जसबापत कोषले ५ हजार ५ सय ९१ सुरक्षण शुल्क प्राप्त गरेको छ ।
