काठमाडौं । सेक्युरिटी प्रेस खरिद काण्डमा भ्रष्टाचारको आरोप लागेपछि विवादमा परेका पूर्व सञ्चारमन्त्री गोकुल बास्कोटाको भक्तपुरको लोकन्थलीस्थित घरको गेटमा शक्तिशाली विस्फोट भएको छ । शक्तिशाली विस्फोटका कारण घरमा लाखौंको क्षति पुगेको छ भने वरपरका अधिकांश घरका सिसा फुटेका छन् ।
बुधबार बिहानै एक्कासी ठूलो आवाजसहित धुवा आएपछि सो क्षेत्रमा स्थानीयबासी अत्तालिन पुगेका थिए । करिब ७ः४५ बजेको समयमा शक्तिशाली विष्फोट भएको जिल्ला प्रहरी कार्यालय भत्तपुरले जनाएको छ । विस्फोटबाट कुनै मानवीय क्षति नभए पनि वरपरका घरका सिसाहरु चर्केका छन्, भने पार्किङ गरिराखेको बा१९च ४७८१ नम्वरको मारुती भ्यानमा क्षति पुगेको छ । नयाँ बनाउँदै गरेको घर भएका कारण मानवीय क्षति नभएको हो । मन्त्री हुनुअघि एक तल्ला मात्रै रहेको बाँस्कोटाको निजि निवास मन्त्री भएपछि तल्ला थप गरी तीन तल्लाको बनाएर फिनिसिङ हुँदै गरेको थियो । विस्फोटबाट घरको गेट ध्वस्त भएको छ भने घरका सबै सिसाहरु फुटेका छन् । त्यस्तै भित्ताहरु समेत बमको छर्राले लागेर क्षतविक्षत भएको छ ।
सेक्युरिटी प्रेस खरिदमा ठूलो आर्थिक घोटाला गरेको आरोप लागेपछि सञ्चार मन्त्री बास्कोटाले यही फागुन ८ गते पदबाट राजिनामा दिन बाध्य भएका थिए । घटनास्थलमा अहिले प्रहरीको टोली पुगेर अनुसन्धान सुरु गरिएको जनाएको छ ।
घट्नामा एकीकृत जनक्रान्तिको मार्गमा अघि बढेको विद्रोही नेकपाको संलग्नता आशंका गरिएको छ । सो पार्टीमाथि प्रतिबन्ध लगाएको एक वर्ष आज पुरा भएको छ । प्रतिबन्ध लगाएपछि महासचिव बिप्लवले नेतृत्व गरेको सो विद्रोही पार्टीका विरुद्धमा पूर्व सञ्चार मन्त्री बाँस्कोटाले गैर राजनीतिक र लुटेराको समुह भन्दै गालीगलौज गर्दै आएका थिए । सो पार्टीले यसअघि बालुवाटारस्थित प्रधानमन्त्री निवास पछाडिको विवादित जग्गामा शक्तिशाली विस्फोट गर्दै जग्गा कब्जा गरिएको घोषणा गरेको थियो ।
बम विस्फोट पछि छिट्टै घर सर्ने योजनामा रहेका सञ्चार मन्त्रीको बसाई सराई रोकिएको छ । हाल प्रधानमन्त्री केपी शर्मा ओलीको निजि निवास बालकोटमा बस्दै आएका बाँस्कोटा नयाँ घरमा सर्ने तयारीका साथ धमाधम फिनिसिङको काम भइरहेको थियो ।
