काठमाडौं। निर्जीवन बीमा कम्पनीले दुई वर्ष अघिको विनाशकारी भूकम्पले क्षति पुर्याएको संरचनाको १७.४४ प्रतिशत दाबी भुक्तानी गर्न बाँकी देखिएको छ। भूकम्पले क्षति पुर्याएको दुर्इ वर्ष १० महिना वितिसक्दा पनि ३४७ वटा पोलिसीको भुक्तानी अझै हुन सकेको छैन। जसमा तीन अर्ब ५४ करोड रुपैयाँ दाबी भुक्तानी गर्न बाँकी छ।
निर्जीवन बीमा कम्पनीमा बीमा गरेका मध्येबाट बीमा कम्पनीमा १६ अर्ब ६८ करोड रुपैयाँ दाबी परेको थियो। जसमा बीमा कम्पनीले छानविन गर्दा १६ अर्ब ९ करोड रुपैयाँ दाबी गर्नुपर्ने देखिएको थियो।
भूकम्प पछि ४ अर्ब ४४ अर्ब रुपैयाँ बीमांक रकम बराबरको १७ हजार ७९९ वटा पोलिसीमा दाबी भुक्तानीको लागि निवेदन परेको थियो। जसमा ६ हजार १६१ वटा पोलिसीहरु दाबीको लागि अयोग्य भएका थिए। कम्पनीले अहिलेसम्म ११ हजार २९१ वटा पोलिसीको १२ अर्ब ५५ करोड रुपैयाँको दाबी भुक्तानी गरेका छन्।
१६ वटा बीमा कम्पनीमा दाबी परेकोमा अहिलेसम्म एभरेष्ट इन्स्योरेन्स र लुम्बिनी इन्स्योरेन्स कम्पनीले मात्र शतप्रतिशत दाबी भुक्तानी गर्न सकेका छन्। सबैभन्दा धेरै युनाइटेड इन्स्योरेन्स कम्पनीले अझै ६८ करोड ४ लाख रुपैयाँ बराबरको दाबी भुक्तानी गर्न सकेको छैन।
बीमा कम्पनीहरुले पूनर्वीमा कम्पनीबाट ७ अर्ब ९२ करोड रुपैयाँको भुक्तानी लिएका छन्। हिमालयन जनरल इन्स्योरेन्स कम्पनीले सबै भन्दा धेरै तीन अर्ब ८५ करोड रुपैयाँको दाबी भुक्तानी गरेको छ तैपनि अझै २१.०८ प्रतिशत रकम दाबी भुक्तानी गर्न बाँकी देखिएको छ। निर्जीवन बीमा कम्पनीका सर्भेयरले अझै २३७ वटा पोलिसीको प्रतिवेदन बुझाएका छैनन्। यसैमा सर्भेयरले १५ हजार ६२३ वटा पोलिसीको प्रतिवेदन बनाएका थिए।
किन हुन सकेन दाबी भुक्तानी
संख्यात्मक रुपमा दाबी भुक्तानी ९८.०५ प्रतिशतको भैसके पनि रकमका हिसाबले धेरै देखिनुको कारण धेरै बीमाङ्क रकमका अपार्टमेन्ट तथा भवनको विवादका कारण हुन नसकेको बीमा समितिका निमित्त कार्यकारी निर्देशक श्रीमान कार्कीले बताए।
अपार्टमेन्टले आवश्यक कागजात समयमा पुर्याउन नसक्दा दाबी भुक्तानी हुन नसकेको कार्कीले बताए। त्यस्ता संरचनाको लागि बीमा कम्पनीले पूर्ण रुपमा भुक्तानी गर्न नसके पनि केही रकम अग्रिम रुपमा भुक्तानी गरेको उनले बताए। साथै त्यस्ता अपार्टमेन्टबाट कुनै पनि उजुरी नपरेको तै पनि बीमा कम्पनीलार्इ चाँडै मिलाएर भुक्तानी गर्न निर्देशन दिएको उनले बताए।
दाबी भुक्तानीहुन बाँकि रहेका कम्पनीहरु विवरण:-
| क्र.स | कम्पनीको नाम | भुक्तानी गर्नु पर्ने संख्या | भक्तानी गर्नु पर्ने रकम | भुक्तानी संख्या | भुक्तानी रकम | पुनर्वीमा बाट भुक्तानी |
| १ | नेपाल इन्स्योरेन्स | 1,342 | 7,720 | 1,275 | 7,145 | 3,104 |
| २ | दि ओरियन्टल | 277 | 7,589 | 271 | 6,575 | – |
| ३ | राष्ट्रिय बीमा कम्पनी | 216 | 1,144 | 137 | 817 | 251 |
| ४ | नेशनल इन्स्योरेन्स | 519 | 7,002 | 490 | 3,742 | – |
| ५ | हिमालयन जनरल | 391 | 48,888 | 386 | 38,553 | 36,621 |
| ६ | युनाइटेड इन्स्योरेन्स | 376 | 10,068 | 369 | 3,264 | 4,867 |
| ७ | प्रिमियर इन्स्योरेन्स | 615 | 15,010 | 570 | 7,646 | 8,162 |
| ८ | एभरेष्ट इन्स्योरेन्स | 115 | 1,408 | 115 | 1,408 | 442 |
| ९ | नेको इन्स्योरेनेन्स | 933 | 6,151 | 930 | 5,879 | 2,976 |
| १० | सगरमाथा इन्स्योरेन्स | 1,803 | 16,333 | 1,762 | 15,509 | 7,279 |
| ११ | प्रभु इन्स्योरेन्स | 856 | 6,650 | 845 | 5,465 | 1,773 |
| १२ | एनबि इन्स्योरेन्स | – | – | – | – | – |
| १३ | प्रुडेन्सियल इन्स्योरेन्स | 599 | 4,711 | 595 | 4,584 | 3,337 |
| १४ | शिखर इन्स्योरेन्स | 1,075 | 12,993 | 1,071 | 10,872 | 4,398 |
| १५ | लम्बिनी जनरल | 495 | 2,544 | 495 | 2,544 | 1,711 |
| १६ | एनएलजी इन्स्योरेन्स | 977 | 4,562 | 935 | 4,426 | 3,075 |
| १७ | सिद्धार्थ इन्स्योरेन्स | 1,049 | 8,147 | 1,045 | 7,078 | 1,277 |
| जम्मा (रु लाखमा) | 11,638 | 160,919 | 11,291 | 125,507 | 79,273 |
