इन्स्योरेन्स खबर/काठमाडौँ: सरकारले पदमुक्त गरेका नेपाल स्टक एक्सचेञ्जका प्रमुख कार्यकारी अधिकृत चन्द्रसिंह साउदलाई काममा फर्काउन सर्वोच्च अदालतले आदेश दिएको छ । आइतबार सर्वोच्च अदालतका न्यायाधीश डम्बर बहादुर शाहीको एकल इजलासले अन्तरिम आदेश जारी गरेको हो ।
साउदले दायर गरेको रिट उपर सुनुवाई गर्दै सर्वोच्चले साउदलाई काममा फर्काउन सरकारका नाममा आदेश दिएको हो । नेप्सेको प्रमुख कार्यकारी साउदले आफुलाई गैरकानुनी ढंगले हटाइएको दाबी गरेका थिए । उनले आफु लोकसेवा आयोगको जसरी नै परीक्षा दिएर कानुनी प्रकृयाबाट नेप्सेको प्रमुख कार्यकारी नियुक्त भएको बताएका थिए ।
केही दिनअघिको क्याबिनेटले तत्कालीन देउवा सरकारले निर्वाचन आचारसंहिता लागेपछि गरेका सबै राजनीतिक नियुक्ति खारेज गर्ने निर्णय गरेको थियो । सोही निर्णयलाई आधार मानी अर्थमन्त्रालयले नेप्से प्रमुख साउदलाई गत आइतबार पदमुक्तको पत्र पठाएको थियो ।
