काठमाडौं । इरानी संसदको राष्ट्रिय सुरक्षा तथा विदेश नीति समितिका प्रमुख इब्राहिम अजीजीले अमेरिकी राष्ट्रपति डोनाल्ड ट्रम्पले होर्मुजका बारेमा दिएको बयानको प्रतिक्रिया दिएका छन्। अजीजीले,‘ट्रम्पले होर्मुजका बारेमा निरन्तर धम्की दिनुको सट्टा आफ्नै सुरक्षामा ध्यान केन्द्रित गर्नुपर्छ।’
सामाजिक सञ्जाल प्लेटफर्म एक्समा अजीजीले लेखेका छन्, ‘ट्रम्पले आफ्नो सुरक्षाका लागि ‘खाद्य ट्रक’मा लुक्नुपर्ने हुन सक्छ।’
अजीजीको यो बयान हिजो राति ट्रम्पले ‘होर्मुजलाई अमेरिकी क्षेत्र घोषणा गर्ने’ बताएको बयानको प्रतिक्रियामा आएको हो।
पछि ह्वाइट हाउसले ट्रम्पले यो बयान मजाकमा दिएको जनाएको थियो। यद्यपि, उनको बयानले व्यापक मिडियाको ध्यान खिचेको छ र धेरै इरानी अधिकारी तथा राजनीतिज्ञले पनि प्रतिक्रिया दिएका छन्। –एजेन्सी
