काठमाडौं । जेनजी आन्दोलनको करिब एक सातापछि खुलेको शेयर बजारमा बिहीबार ठूलो पहिरो गएको छ। नेप्से परिसूचक १६० अंकले घटेर २५०० को थोरै माथि क्षेत्रमा बजार बन्द भएको छ।
जेनजी आन्दोलनपश्चात एक साता बजार बन्द भयो। २०७२ साल वैशाख १२ गते नेपालमा गएको शक्तिशाली भूकम्पपछि नेपालमा शेयर कारोबार करिब १ महिना रोकिएको थियो।
प्राकृतिक प्रकोप अथवा देशमा ठूलो संकट आउँदा खुलेको शेयर कारोबारमा ठूलो गिरावाट आएको यो पहिलो घटना भने होइन। २०७२ वैशाख १२ गतेको विनाशकारी भूकम्प जानुअघि नेप्से परिसूचक ९३८.१९ को विन्दुमा बन्द भएको थियो। भूकम्पपछि करिब १ महिना शेयर कारोबार हुन सकेन।
त्यसपछि बजार लगातार ४ दिनसम्म घटेको थियो। चौथो दिनसम्म नेप्से परिसूचक घटेर ८३७.८३ को विन्दुसम्म आइपुगेको थियो। भूकम्पपछि खुलेको बजार करिब ११ प्रतिशत घटेको थियो र त्यसपछि भने बजारले बुलिस प्रवृत्ति समातेको थियो।
भूकम्पपछि खुलेको बजार ४ दिन घट्दा करिब १०० अंक घटेको थियो र त्यसपछि बजार निरन्तर ९ दिन बढेको थियो। ८ दिनमै नेप्से परिसूचक १०७ अंकले वृद्धि भएर ४ दिनको घटाइलाई कभर गरेको थियो।
भूकम्पपछि नेपालको शेयर बजारले बुलिस प्रवृत्ति समात्यो र उक्त बुल १८०० माथि पुग्यो।
