काठमाडौं । हिन्दु महिलाहरुको महान चाड तीजलाई शेयर बजारले हरियो भएर स्वागत गरेको छ। आज मंगलबार नेप्से परिसूचक ४.८३ अंकले बढेर २७६६.०९ को विन्दुमा बन्द भएको हो।
यो दिन बजारमा नेप्से उपसमूहमा रहेका ९ वटा समूह बढेका छन् भने ४ वटा घटेका छन्। बजारमा आज अन्य समूह सर्वाधिक १.४२ प्रतिशतले बढ्दा उत्पादन तथा प्रशोधन समूह सर्वाधिक ०.६८ प्रतिशतले घटेको छ।
बजारमा आज ४ अर्ब १८ करोड रुपैयाँ बढीको कारोबार भएको छ। यो कारोबार हिजोको तुलनामा कम हो। शेयर बजारमा कोभिड–१९ यता महिला लगानीकर्ताको सहभागिता उत्साहजनक रहेको छ। तर, आज तीज परेकोले महिला लगानीकर्ता उपस्थिति बजारमा कम हुँदा कारोबार पनि घटेको हो।
आज बजारमा विकास हाइड्रोपावरका शेयरधनीहरु मालामाल भएका छन्। यो कम्पनीको शेयरभाउ करिद १० प्रतिशतले बढेको छ।
यो दिन बजारमा कुमारी सबल योजनाका इकाइधनीहरुले सर्वाधिक गुमाए। यो योजनाको इकाइमूल्य सर्वाधिक ३.६६ प्रतिशतले घटेको छ।
आज बजारमा हिमालयन रिइन्स्योरेन्सको शेयर कारोबार सर्वाधिक भएको छ। यो कम्पनीको ४८ करोड ९५ लाख रुपैयाँ बढीको शेयर कारोबार भएको छ।
