काठमाडौं । एलन मस्कको स्टार लिंक इन्टरनेट भित्र्याएको बंगलादेशले वैश्विक सूचना प्रविधि कम्पनी गुगलको ‘गुगल पे’ सेवा समेत शुरू गरेको छ।
यो सेवा गुगल, सिटी बैंक, मास्टरकार्ड र भिसासँगको सहकार्यमा सुरु गरिएको हो। यो सुरुवातसँगै सिटी बैंक बंगलादेशको पहिलो बैंक बनेको छ, जसले आफ्ना ग्राहकहरूलाई गुगलको डिजिटल वालेट सेवाहरू प्रदान गर्दछ।
बंगलादेशसहित दक्षिण एशियाको तीनवटा देशमा गुगल पे को सेवा उपलब्ध भएको छ। यसअघि भारत र पाकिस्तानमा ‘गुगल पे’ ले डिजिटल वालेट(अभाैतिक भुक्तानी) सेवा सञ्चालनमा ल्याइ सकेको छ।
गत महिना मात्र बंगलादेशले भूउपग्रह प्रणालीमा आधारित अमेरिकी कम्पनीको स्टार लिंक कम्पनीको इन्टरनेट सेवा सञ्चालनमा ल्याएको थियो। बंगलादेशमा राजनीतिक संकट र अस्थिरताका बावजुद सरकारको प्रोत्साहन प्याकेजका कारण विदेशी लगानीका कम्पनीहरू आकर्षित भइरहेका छन् ।
सिटी बैंकका ग्राहकहरूले आफ्नो मास्टरकार्ड वा भिसा क्रेडिट र डेबिट कार्डहरू गुगल वालेटमा लिङ्क गर्न सक्छन्, जसले गर्दा उनीहरूलाई स्थानीय र अन्तर्राष्ट्रिय रूपमा छिटो, सुरक्षित र सम्पर्करहित भुक्तानीको लागि गुगल पे प्रयोग गर्न सक्षम बनाउँछ।
गुगल पेले प्रयोगकर्ताको डेटा सुरक्षित गर्न उन्नत इन्क्रिप्शन प्रविधिहरू समावेश गरेको छ। जसले गर्दा यसलाई अभाैतिक लेनदेनको लागि सुरक्षित र भरपर्दो विकल्प बनाइएको छ। फलस्वरूप, प्रयोगकर्ताहरूले अब भौतिक कार्डहरू बोक्न आवश्यक पर्दैन -स्मार्टफोनहरू नै उनीहरूको डिजिटल वालेट बन्छन् ।
बिजनेश स्ट्याण्डर्डका अनुसार, केन्द्रीय बैंकका गभर्नर अहसान एच मन्सुरले स्थानीय र विदेशी लगानीकर्ताहरू दुबैको लागि बंगलादेशको आकर्षणको बारेमा आशावाद व्यक्त गर्दै गुगल पेको सुरुवातलाई स्वागत गरेका छन्।
वित्तीय समावेशीकरणको व्यापक लक्ष्यलाई प्रकाश पार्दै गभर्नरले भने, “हामी समावेशी वित्तीय प्रणाली सिर्जना गर्न काम गरिरहेका छौं। प्रत्येक बंगलादेशी बैंकिङ र वित्तीय क्षेत्रसँग जोडिनुपर्छ। हामी बैंकहरूलाई डिजिटल समाधानहरू अपनाउन प्रोत्साहित गरिरहेका छौं।”
