काठमाडौं । धुम्बाराहीमा पाँँचतारे होटल सञ्चालन गरिरहेको अकामा होटल लिमिटेडले प्रस्तावित प्राथमिक शेयर निष्काशन(आइपीओ) को अंकित मूल्य संशोधन गरेको छ।
होटलले प्रति कित्ता रू. ५० का दरले आइपीओ जारी गर्ने तयारी गरेकोमा धितोपत्र बोर्ड नेपालको निर्देशन पछि अंकित मूल्य संशोधन गर्दै रू. १०० कायम गरेको छ। अंकित मूल्य संशोधनसँगै आइपीओ कित्ता २२ लाख ५० हजारमा सीमित हुन पुगेको छ। होटलले असार ६ गते बोर्डमा अंकित मूल्य संशोधन सँगै संशोधित आह्वान पत्र पेश गरेको हो।
होटलले सर्वसाधारणबाट कुल २२ करोड ५० लाख रूपैयाँ चुक्ता पूँजी जुटाउनका लागि रू. ५० अंकित मूल्यमा ४५ लाख कित्ता जारी गर्ने घोषणा गरेको थियो।
सानिमा समूह मुख्य प्रवर्द्धक रहेको अकामा होटल लिमिटेडले रमादा काठमाडाैं धुमबाराही ब्राण्डमा पाँच तारे होटल सञ्चालन गरिरहेको छ।
होटलले आइपीओ निष्काशनका लागि २०८१ असार २६ गते धितोपत्र बोर्डमा निवेदन दिएको थियो। आइपीओका लागि आवेदन दिएको वर्ष दिन पुग्नै लाग्दा समेत बोर्डले निष्काशनको स्वीकृति टुङ्गो लगाएको छैन।
