काठमाडौं । सरकारले स्वास्थ्य बीमा कार्यक्रममा आबद्ध स्वास्थ्य सेवा प्रदायक संस्थाबाट दाबी प्रबिष्टि हुनसाथ शोधभर्नाको व्यवस्था कार्यान्वयन गर्ने तयारी गरेको छ।
स्वास्थ्य तथा जनसंख्या मन्त्रालयले आज सार्वजनिक गरेको स्वास्थ्य बीमा सुधार सुझाव कार्यदलको प्रतिवेदनको कार्यान्वयन कार्ययोजनामा दाबी परीक्षण र भुक्तानीको कार्यतालिका बनाई दाबी प्रबिष्टि हुनासाथ शोधभर्ना गर्ने (रियल टाइम क्लेम एन्ड रियल टाइम पेमेन्ट) व्यवस्था कार्यान्वयनमा ल्याउने योजना समेटिएको छ। यो व्यवस्था कार्यान्वयन भएमा दाबी व्यवस्थापनमा सुधार हुने मन्त्रालयको अपेक्षा रहेको छ।
यसैगरी सबै सेवाप्रदायक संस्थाले इलेक्ट्रोनिक मेडिकल रेकर्ड प्रयोग गरी एप्लिकेसन प्रोग्रामिङ इन्टरफेस (एपीआई)मार्फत दाबी प्रविष्टि गर्ने व्यवस्था पनि कार्यान्वयन गरिने मन्त्रालयले आफ्नो कार्ययोजनामा उल्लेख गरेको छ।
यी व्यवस्थाको जिम्मेवार निकाय स्वास्थ्य बीमा बोर्ड तथा सहयोगी निकाय सेवा प्रदायक स्वास्थ्य संस्था र स्वास्थ्य मन्त्रालय हुनेछन्।
