काठमाडौं । मुगुम कार्मारोङ्ग गाउँपालिकाले यार्सागुम्बा टिप्न जाने सङ्कलकहरुको दुर्घटना बीमा गराएको छ । मुगुका विभिन्न पाटनमा यार्सागुम्बा टिप्न जाने सङ्कलकहरुको सुरक्षाका लागि उक्त गाउँपालिकाले दुर्घटना बीमा गराएको हो ।
यार्सागुम्बा टिप्न जाने क्रममा र फर्कने क्रममा पालिकाका सिमानाभित्र कोही घाइते भएमा उपचारमा सहयोग पुगोस् र कसैको मृत्यु भइहाल्यो भने आश्रित परिवारलाई सहयोग पुगोस् भनेर गाउँपालिकाले आथिक वर्ष २०७६/७७ देखि दुर्घटना बीमा शीर्षकमा बजेट छुट्याउँदै आएको छ ।
यस बीमा सेवा पाउन वैधानिक रुपमा पालिकाको प्रवेश शुल्क तिरेको हुनुपर्नेछ । वनमा प्रवेश शुल्क लिँदा गाउँपालिकाले सङ्कलकको आवश्यक व्यक्तिगत विवरणसँगै लिने गरेको छ ।
त्यस्तै, पाटनमा सुरक्षाका लागि खटिने सुरक्षाकर्मी, स्वास्थ्य टोली र हेराला वन सुरक्षा युवादस्तालाई पनि यस बीमा कार्यक्रममा समेटिएको पालिकाले जनाइएको छ ।
गत वर्ष यस योजनाबाट दुईजनाको परिवार लाभान्वित भएको पालिकाको भनाइ छ । बीमाबापत पीडित परिवारले न्यूनतम रु ५० हजार र अधिकतम रु एक लाख ५० हजारसम्म रकम पाउनेछन् ।
पाटनमा यार्सा टिप्नु अत्यन्तै जोखिम रहेको छ । पालिकाको यस बीमा योजनाले पीडित र आश्रित परिवारलाई ठूलो राहत पुग्ने विश्वास छ ।
