काठमाडौं । लुम्बिनी प्रदेशमा रहेका निर्जीवन बीमकहरुले नेपाल बीमा प्राधिकरणबाट निर्धारण गरिएका दररेटबमोजिम बीमालेख जारी गर्ने निर्णय गरेका छन्।
प्राधिकरणको लुम्बिनी प्रदेश कार्यालयमा आज आयोजित निर्जीवन बीमा व्यवसाय गर्ने बीमकहरुका प्रदेश प्रमुखहरुसँगको समसामयिक विषयमा छलफलमा यस्तो निर्णय भएको हो।
निर्जीवन बीमकहरुले कषि तथा पशुपन्छी बीमा गर्न जिल्ला तोकिएको बीमकलाई जिल्लाअन्तर्गत रहेका प्रत्येक पालिकाको सम्बन्धित विभागमा महिनाको एकपटक सम्पर्क गर्न वा पालिकाले उपलब्ध गराएको हेल्प डेस्कबाट काम गर्न समन्वय गर्ने निर्णय पनि छलफल भएको छ।
छलफल बीमा प्राधिकरणको लुम्बिनी प्रदेश कार्यालय प्रमुख पूर्णबहादुर थापाको उपस्थितिमा भएको थियो। छलफलमा कार्यालयका निर्देशक मो दिल्दार अन्सारी पनि सहभागी भएका थिए।
छलफलमा १० वटा निर्जीवन बीमकका प्रदेश प्रमुखहरुको सहभागिता थियो।
