काठमाडौं । सिद्धार्थ इन्स्योरेन्स कम्पनीका प्रमुख कार्यकारी अधिकृत विरेन्द्र वैदवार क्षेत्रीको दोस्रो कार्यकालमा तलब भत्ता तथा अन्य सुविधाहरु ५५ प्रतिशतले बढेको छ । कम्पनीले बैदवारलाई २०७८ भदौमा दोस्रो कार्यकालका लागि थप गरेको थियो ।
कम्पनीले गत आर्थिक वर्ष २०७८/७९ मा वैदवारलाई पारिश्रमिक, भत्ता तथा अन्य सुविधा बापत एक करोड ४० लाख ५६ हजार ८०२ रुपैयाँ भुक्तानी दिएको छ । कम्पनीले यस भन्दा अघिल्लो आर्थिक वर्षमा वैदवारलाई ९० लाख २८ हजार रुपैयाँ दिएको थियो ।
यस आर्थिक वर्षमा सञ्चालकहरुले बैठक भत्ता बापत १३ लाख ५० हजार रुपैयाँ तथा अन्य समितिको बैठक भत्ता वापत १५ लाख १४ हजार रुपैयाँ प्राप्त गरेका छन् । कम्पनीले अन्य पदाधिकारीहरुलाई पारिश्रमिक भत्ता तथा सुविधा बापत २ करोड ९५ लाख २१ हजार ९०८ रुपैयाँ भुक्तानी दिएको छ । कम्पनी भोलि २१ औं वार्षिक साधारणसभा आह्वान गरेको छ । साधारणसभाले शेयरधनीहरुका लागि भने ९ प्रतिशत बोनस शेयरको प्रस्ताव पारित गर्दैछ । शेयरधनीले ११ करोड ५९ लाख बराबरको बोनस शेयर प्राप्त गर्नेछन् ।
