काठमाडौं । हिमालयन र एभरेष्ट इन्स्योरेन्सको सफल मर्जर पछि बनेको हिमालयन एभरेष्ट इन्स्योरेन्स कम्पनीको पहिलो कारोबार ५०९.६० रुपैयाँमा भएको छ । नेप्सेले ओपनिङ प्राइस ५१०.४८ रुपैयाँ दिएको थियो । तर पहिलो कारोबार सँगै कम्पनीको शेयर मूल्यमा लगातार गिरावट भइरहेको छ ।
हिमालयन जनरलको कारोबार रोक्का हुनुभन्दा अगाडी ५२० रुपैयाँमा कारोबार भएको थियो । त्यस्तै एभरेष्ट इन्स्योरेन्स कम्पनीको शेयर ५०० रुपैयाँमा कारोबार भएको थियो । हिमालयन र एभरेष्ट विचमा एक बराबर ०.८५ को अनुपातमा मर्जर हुँदा एभरेष्टका शेयरधनीको १५ प्रतिशतले शेयर संख्या घटेको छ ।
आजको पहिलो कारोबार दिनमै यो समाचार तयार पार्दासम्म ४० रुपैयाँले घटेर ४७० रुपैयाँमा झरेको छ । सफल मर्जर पछिको दोस्रो बजारको कारोबार भने दुबै कम्पनीका लागि दुखद भएको छ । कम्पनीको शेयर मूल्य अझै तल झर्ने क्रम जारी छ । तुलनात्मक रुपमा अन्य बीमा कम्पनीको शेयर मूल्य पनि धेरै तल झरेका कारण यसको शेयर मूल्यमा पनि गिरावट आएको हो ।
कम्पनीका शेयरधनीहरुले तीन महिना चार दिन पछि दोस्रो बजारमा कारोबार गर्न पाएका छन् । दुई कम्पनीको शेयर कारोबार पछिल्लो समय बैशाख २२ गते भएको थियो ।
