काठमाडौं । वैदेशिक रोजगारी म्यादी जीवन बीमाका लागि जीवन बीमा कम्पनीहरूबीच व्यवसाय र जोखिम बाँडफाँडको विषयमा सहमति भएको छ। स्वदेशी पुनर्बीमकलाई पुल म्यानेजर तोकेर १४ जीवन बीमक र ३ लघु जीवन बीमकले पुल प्रणालीमा सहभागी हुने सहमति भएको हो।
बीमकका अनुसार पुलमार्फत् प्राप्त हुने व्यवसायमध्ये ५० प्रतिशत हिस्सा समानुपातिकरूपमा बाँड्ने र बाँकी ५० प्रतिशतमध्ये गत आर्थिक वर्षको बजार हिस्साका आधारमा बाँडफाँड गर्ने सहमति बनेको छ। यो प्रारम्भिक सहमतिका आधारमा सहमतिको मस्यौदा तयार पारेर नेपाल बीमा प्राधिकरणमा पेश गर्नेछ। प्राधिकरणको सञ्चालक समितिबाट निर्णय भएपछि यो सहमतिको मस्यौदाले औपचारिक दस्तावेजका रूपमा मान्यता पाउनेछ ।
नेपाल बीमा प्राधिकरणले प्रकाशन गरेको वैदेशिक रोजगार बीमाको तथ्यांक अनुसार गत आर्थिक वर्ष २०८०।८१ मा कुल १० वटा जीवन बीमकले यो बीमालेख बेचेकोमा सन नेपाल लाइफको सर्वाधिक २७ प्रतिशत हिस्सा रहेको थियो । पुल प्रणालीमा सन नेपालले करिब ३० प्रतिशत हिस्सा प्राप्त गर्नेछ।
यसैगरी गत आवमा दोश्रो नेपाल लाइफ २० प्रतिशत, तेश्रो आइएमई लाइफ ११ प्रतिशत, चौथो एशियन लाइफ १० प्रतिशत, पाँचौं नेशनल लाइफ ९ प्रतिशत हिस्सा ओगटेको थियो । यसबाहेक सूर्यज्योतीको ८, सानिमा रिलायन्सको ७, रिलायबल नेपाल लाइफको ६र सिटिजन लाइफको ३ प्रतिशत हिस्सा रहेको थियो । प्रभू महालक्ष्मी लाइफको हिस्सा एक प्रतिशतभन्दा मुनी रहेको थियो ।
