काठमाडौं । चालु आर्थिक वर्षको भदौ महिनामा १ खर्ब १२ अर्ब रुपैयाँ रेमिट्यान्स भित्रिएको छ। आज नेपाल राष्ट्र बैंकले प्रकाशन गरेको वित्तीय विवरण अनुसार साउनको तुलनामा भदौमा केहि कम रेमिट्यान्स भित्रिएको देखिन्छ। गत मा साउनमा १ खर्ब १६ अर्ब रेमिट्यन्स भित्रिएको थियो ।
चालु आर्थिक वर्षको पहिलो २ महिनामा २ खर्ब २८ अर्ब ३७ करोड रेमिट्यान्स भित्रिएको छ। यो गत वर्षको यसै अवधिको तुलनामा २२।१ प्रतिशतले धेरै हो। अघिल्लो वर्षको सोही अवधिमा विप्रेषण आप्रवाह १९.८ प्रतिशतले बढेको थियो ।
अमेरिकी डलरमा विप्रेषण आप्रवाह १७.७ प्रतिशतले बढेर १ अर्ब ७३ करोड पुगेको छ । अघिल्लो वर्ष यस्तो आप्रवाह ११.३ प्रतिशतले बढेको थियो । समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या २८.३ प्रतिशतले घटेर ७४ हजार४५५ कायम भएको छ ।
