काठमाडौं । मोरङको बेलबारी २ स्थित लालभित्तीका सन्त बहादुर श्रेष्ठ सिटिजन लाइफ इन्स्योरेन्सका ‘सिनियर एजेन्सी म्यानेजर’ हुन् । उनी बीमा क्षेत्रमा प्रवेश गरेको जम्मा पाँच वर्ष मात्र पुग्दैछ भने,यही पाँच वर्षे अवधिमा नै आफ्नो जीवनमा ठूलो परिवर्तन भएको कथा सुनाएका छन् । कतिपयलाई उनले सुनाएका कथा, अनुभव सहजै पत्याउन मुस्किल पनि पर्ने गरेको छ । मुस्किल नहोस् पनि कसरी ? अहिलेको त्यो अन्तराष्ट्रिय अवार्ड लिइरहेको सिटिजन लाइफका सिनियर एजेन्सी म्यानेजर अनि हिजो पाँच वर्ष अघिको एक सामान्य ‘ट्रयाक्टर ड्राईभर’ । त्यो पनि अरुको ट्रयाक्टर चलाउँने व्यक्ति जसले बीमा क्षेत्रमा लागेर नै आफ्नै पैसाले दुईवटा गाडी र टिपर किन्न सफल भए ।
अझ गहिराईमा जाने हो भने उनको जन्मथलो ताप्लेजुङ रहेको र त्यहाँ आफ्नो बुवाआमाले अर्काको घरमा खेती, किसानी, हलीको भूमिका निभाएर आफ्नो बाल्यकाल गुजारेको उनले निर्धक्क सुनाएका छन् । आफू पनि हली गरेर, अर्काको अधियाँ गरेर बल्ल ट्रयाक्टर ड्राईभर बन्न सकेको इतिहास सुनाउँछन् ।
सिनियर एजेन्सी म्यानेजर श्रेष्ठले इन्स्योरेन्स खबरसँग भने, ‘मेरो पृष्ठभूमी भनेको म एउटा ट्रयाक्टर चालक हो । त्यही भएर मलाई पहिले सबैले ट्रयाक्टर ड्राईभरको रुपमा मात्रै चिन्ने गरेका थिए । विगतमा मेरो इतिहास त्यस्तो थियो भने जब मैले इन्स्योरेन्सको एजेन्सी म्यानेजर बन्ने अवसर पाए अनि मेरो जीवनशैलीमा नै धेरै परिवर्तन आयो । यी सबै परिवर्तनका श्रेय म बीमा क्षेत्रलाई नै दिन चाहान्छु ।’
श्रेष्ठले हालसम्म बीमासँग सम्बन्धित विभिन्न अन्तर्राष्ट्रिय अवार्डहरु समेत हात पार्न सफल भएका छन् । बीमा क्षेत्रमा रातदिन नभनी खटेका उनी सिटिजन लाइफ इन्स्योरेन्सको सिनियर एजेन्सी म्यानेजर मात्रै बनेका छैनन् लाखौ युवाहरुका लागि असल प्रेरणाको स्रोत समेत बन्न सफल भएका छन् ।
यसरी सुरु भएको थियो श्रेष्ठको बीमा क्षेत्रको यात्रा
उनले सिटिजन लाइफ इन्स्योरेन्समा आज भन्दा करिब चार वर्ष अघि बीमा क्षेत्रको यात्रा सुरु गरेका थिए । अहिले उनले बीमा क्षेत्रको यात्रा सुरु गरेको पाँचौ वर्ष पुगेको छ भने यस अवधिमा हाँसिल गरेका अधिकांश उपलब्धिका लागि सिटिजन लाइफ इन्स्योरेन्सलाई धन्यवाद दिन चाहेका छन् ।
सिटिजन लाइफ इन्स्योरेन्सले आफूलाई काम गर्ने संस्कार सिकाएको र त्यो उनलाई आफ्नो जीवनको निकै ठूलो उपलब्धि समेत लाग्ने गरेको बताएका छन् । पैसाले नै मानिसको जीवनमा धेरै परिवर्तन ल्याउँछ भन्ने कुरा उनलाई बीमा क्षेत्रले सिकाएको सुनाउँछन् ।
उनले आफूसँग अहिले पनि विगतमा ट्रयाक्टर चलाएको तस्बिरहरु राखेको र त्यस्ता तस्वीरहरु देख्दा आफ्नो जीवनमा निकै ठूलो परिवर्तन आएको महशुस गर्छन् । यो कुरा उनले आफूले मात्रै महशुस गरेको कुरा होइन । उनलाई केही दिन अघि पाँच वर्ष अघिका फोटोहरु सामाजिक संजालमा राख्दा शुभचिन्तकहरुले दिएको प्रतिक्रीया पनि हो । उनका साथीहरुले बीमाले पनि व्यक्तिको जीवनमा यति धेरै परिवर्तन ल्याउँदो रहेछ भन्ने किसिमका सकारात्मक प्रतिक्रिया दिएको उनी सम्झन्छन् । पैसा कमाउँदै जाँदा मानिसको जीवनमा आउँने परिवर्तनलाई उनले बीमा क्षेत्रकै कारण नजिकबाट नियाल्ने अवसर पाए ।
उनी भन्छन् इतिहास बिर्सनु हुँदैन
आफूभन्दा अग्रजहरुको कुरा सुन्न नरुचाउँने अधिकांश यूवा पुस्ताहरुलाई उनले इतिहासको सम्मान गर्नु पर्ने सन्देश दिएका छन् । उनले आफूले सुरुवात गरेको पहिलेका कतिपय व्यवसाय, कतिपय ठूलाबडाका अनुभवहरु नै जीवनको ठूलो इतिहास हुने भएकाले त्यस्तो कामहरु झट्टै बिर्सन नहुने सुझाव दिएका छन् । आफूले दु:ख गरेर नै बीमा क्षेत्रमा स्थापित भएको सम्झदै उनले सजिलै सफलता मिल्ने कुरा भन्दा पनि मेहनतको फल मिठो हुने बताउँछन् ।
भान्जाको सहयोगमा छिरे बीमा क्षेत्र
उनलाई आफ्नै भान्जाले बीमा क्षेत्रको यात्रामा आवद्ध गराए । भान्जा अभिकर्ता थिए भने उनकै सहयोगमा श्रेष्ठले पनि अभिकर्ता बन्ने सुनौलो मौका पाए । त्यसरी बीमामा छिरेका उनले एजेन्सी म्यानेजर हुँदै सिनियर एजेन्सी म्यानेजर हुन पाएकोमा त्यसको जस आफ्ना बीमितहरुलाई समेत दिन चाहेका छन् । हालसम्म उनले दुई सय ५९ जना अभिकर्ताहरुलाई बीमा क्षेत्रमा आवद्ध गराएका छन् । त्यस्तै, ६ सय ५८ जनाको बीमा गराएका छन् भने उनले बीमा गराएका तीनजना बीमितहरुको निधन पनि भईसकेको अवस्था छ ।
धेरैजनाको घर परिवारलाई सुरक्षण दिन पाउँदा उनलाई भित्रभित्र खुशी समेत मिल्ने गरेको छ । ठोस र साच्चो कुरा बोल्नेले बीमा क्षेत्रमा सबैको विश्वास जित्दै जाने उनको बुझाई छ ।
बीमा अभिकर्ता पेशामा लागेपछि बीमालाई नजिकबाट नियाल्न पाए
उनले बीमा क्षेत्रमा लागेपछि नजिकैबाट बीमालाई नियाल्ने मौका पाएको बताएका छन् । कसैको मृत्यु भएको ठाउँमा पनि पहिला दुई, चारवटा स्याउँ बोकेर जाने उनले बीमाकै कारण आठ, दश लाखको चेक बोकेर जाने अवसर पनि पाए । त्यतिबेला उनलाई फलफूल लगेर जानु र लाखौको चेक बोकेर जानुमा निकै फरक महशुस भयो । बीमितहरुले आफूलाई भगवान जतिकै पूजेको सम्झिदै उनले बीमा पेशाप्रति निकै गर्व लाग्ने गरेको सुनाए ।
बाल बीमा सम्बन्धि रोचक घटना
केही वर्ष पहिले उनले एक परिवारमा सम्झाई बुझाई गरेर बालबीमा गराएका थिए । हकवालाको मृत्यु हुँदा १५,२० वर्षसम्म पढ्ने खर्च बीमाले दिँदा बीमित निकै खुशी भएका थिए । त्यस्तै, खोलामा बालुवा चालेर गुजारा गर्ने धेरै घर परिवारहरुलाई उनले जीवन बीमामा समेटेका छन् ।
ठूलो रोग लाग्दा गाउँमा चन्दा मागेर उपचार गराउँने घर परिवारलाई पनि उनले बीमाको माध्यमबाट रक्षावरण गर्न सिकाएका छन् ।
कमजोर आर्थिक अवस्थाका कारण रोकिएको थियो शैक्षिक यात्रा
उनले आफ्नो आर्थिक अवस्था कमजोर भएका कारण विगतमा एसएलसी भन्दा धेरै पढ्ने अवसर नपाएको बताउँछन् । अध्ययनले कमी भएर मात्रै बीमामा काम गर्न छेक्दैन भन्ने उनलाई लाग्छ । उनले बीमाकै कारण डिग्री पढेको मान्छेले सरह मेहनतको डिग्री र इमान्दारीताको डिग्रीले पनि मानिसलाई सफलता दिलाउँछ भन्ने अनुभव गर्न पाएका छन् ।
उनले बीमालाई विगतको जस्तो हिसाबले हेर्नु गलत हुने भएकाले अब यसको वास्तविकता सबैले बुझ्नु पर्नेमा जोड दिएका छन् । त्यस्तै, आज बिरुवा रोप्दा भोलि लामो समयमा मात्रै रुख बने जस्तै आज काम सुरु गर्दा भोलिको सुन्दर भविष्यको ख्याल गरेर काम गर्नु पर्ने उनी बताउँछन् ।
परिवार र छिमेकीलाई पनि बीमा बुझाऔं
उनले एक जनाले मात्रै बीमा बुझ्दा बीमा गराउँन सहज नहुने सुनाउँछन् । सबै घर परिवार र छिमेकीले बीमा बुझे भने मात्रै बीमाले धेरै जनाको घर परिवारको चुल्हो बाल्न सघाउँने र सबैको भविष्य बनाउँछ भन्ने ज्ञान फैलिने उनी विश्वास गर्छन् ।
उनले सिटिजन लाइफका ब्राण्ड एम्बेस्डर बरिष्ठ कलाकार मदन कृष्ण श्रेष्ठ र हरिवंश आर्चायले कम्पनीसँगको सहकार्यमा बीमा चेतना फैलाउँन पुर्याएको योगदानको पनि स्मरण गर्न चाहेका छन् । बीमा भनेको हाम्रो जीवनमा नभई नुहने चिज हो भन्ने ज्ञान ब्राण्ड एम्बेस्डरले बुझाए जस्तै यो बुझ्नेले राम्रो गर्दै गएको सुनाउँछन् ।
उनले सवारीको बीमा गर्न तम्सिने अधिकांश नागरिकहरुले आफ्नै जीवन बीमा नगरेको देख्दा अचम्म लाग्ने गरेको बताउँछन् । त्यस्ता नागरिकहरुलाई आफ्नो कमाईको दुई प्रतिशत मात्र भए पनि बीमामा लगानी गर्न उनले सुझाव दिएका छन् । उनले बीमाले जोखिम बहन गर्ने र बचत गर्ने दुई किसिमका काम एकसाथ गर्ने भएकाले बीमाको यो पक्ष पनि उनलाई निकै महत्वपूर्ण लाग्ने गरेको छ ।
भोलिको दिनमा कसैलाई घातक रोग लाग्दा अरुसँग हात थाप्नु भन्दा पनि आफ्नै खाताबाट पैसा चलाउदा धेरै फरक पर्ने भन्दै सिनियर एजेन्सि म्यानेजर श्रेष्ठले बीमाको महत्व बुझ्न र बीमा गरी हाल्न जो कोही पछि पर्न नहुने सुझाव दिएका छन् । उनले आफ्नै घरपरिवारमा चार जना सदस्य रहेको र सबैको जीवन बीमा गराएको पनि बताए ।
कुनै दिन आफ्नो छोरीको एशियन लाइफ इन्स्योरेन्समा जीवन बीमा गराएको र आफूले जम्मा ३२ सय ५० रुपैयाँ मासिक किस्ता तिर्न नसकेको उनले सम्झिएका छन् । तर, अहिले उनले आफ्नो छोरीको दुई लाख ७७ हजार रुपैयाँ किस्ता तिरेर बीमा गरिरहेका छन् । आफूलाई यस्तो स्तरमा पुग्न मद्धत गरेको भन्दै उनले बीमा क्षेत्रको योगदानकै कारण पूरा जीवन बदलिएको आभाष हुने गरेको सुनाएका छन् ।
