काठमाण्डौं । नागरिक लगानी कोषले योगदानकर्ताबाट संकलन गरेको बीमाशुल्कवापतको ठूलो रकम राष्ट्रिय बीमा संस्थानमा भुक्तानी नगरेको तथ्य प्रकाशमा आएको छ। आ.व. २०७८।७९ को लेखा परिक्षण प्रतिवेदनमा कोषले योगदानकर्ताबाट संकलन गरेको रकम र संस्थानमा बीमाशुल्कवापत भुक्तानी गरेको रकम बीच २१ करोड ९८ लाख ५९ हजार रुपैयाँ बराबरको अन्तर देखिएको छ ।
महालेखा परिक्षकले जारी गरेको आ.व. २०७८।७९ को लेखा परिक्षण प्रतिवेदनमा यसपटक पनि संकलित बीमाशुल्क रकम र जम्मा गरिएको बीमाशुल्क रकमबीचको ठूलो भिन्नता औंल्याइएको छ।
यसैगरी कोषले सावधिक जीवन बीमावापत कूल ३ अर्ब ४४ करोड ७५ लाख रुपैयाँ दायीत्व देखाएकोमा केन्द्रले संस्थानलाई देखाएको दायीत्व जम्मा ३ अर्ब ६ करोड ८६ लाख रुपैयाँ रहेको छ । फरक दायीत्व ३७ करोड ८८ लाख ४३ हजार रुपैयाँ बराबरको हिसाब मिलान नभएको महालेखा परिक्षकले टिप्पणीमा उल्लेख गरेको छ ।
